Azərbaycan, Bakı, 12 iyun /Trend, müxbir A.Axundov/
Azərbaycan iqtisadiyyatına birbaşa investisiyalar qismində yatırılan xarici kapitalın ümumi həcmi 1,4 milyard dollar təşkil edib ki, burada neft-qaz sektorunun xüsusi çəkisi 83,2 faiz səviyyəsində olub. Trend-in məlumatına görə, bu barədə çərşənbə günü Azərbaycan Mərkəzi Bankının tədiyyə balansında deyilir.
Bu investisiyalar Azərbaycan ərazisində, əsasən, neft-qaz layihələri çərçivəsində "BP Exploration Ltd" ("Şahdəniz") və Azərbaycan Beynəlxalq Əməliyyat Şirkəti tərəfindən "Azəri-Çıraq-Günəşli" yatağında aparılan işlərin maliyyələşdirilməsi məqsədilə istifadə edilib.
AMB-nin hesablamalarına görə, qeyri-neft sektoruna cəlb edilmiş birbaşa investisiyaların həcmi 238,1 milyon dollar təşkil edib ki, bu da ölkəyə cəlb edilmiş birbaşa investisiyaların ümumi həcminin 16,8 faizini təşkil edib.