Azərbaycan, Bakı, 13 avqust /Trend, müxbir E. İsmayılov/
"Şahdəniz qaz-kondensat yatağının ikinci mərhələsinin reallaşdırılması üçün iki qazma qurğusu kifayət edəcək. Trend-in məlumatına görə, bu barədə çərşənbə axşamı "Şahdəniz-2" layihəsinin Ətraf Mühitə və Sosial Sahəyə Təsirinin Qiymətləndirilməsi (ƏMSSTQ) sənədinin ictimai dinləmələri zamanı "Şahdəniz-2" layihəsinin əməliyyat üzrə meneceri İlqar Məmmədzadə bildirib.
Məmmədzadənin sözlərinə görə, "Şahdəniz-2" çərçivəsində əlavə qurğuların tikintisi nəzərdə tutulmayıb və qrafikə uyğun olaraq Heydər Əliyev adına və "İstiqlal" üzən qazma qurğularından qazma işləri kifayət edəcək.
Məmmədzadə bildirib: "Yeni layihələr çərçivəsində ehtiyac olduğu təqdirdə əlavə qazma qurğuların tikintisinin mümkünlüyü məsələsinə baxıla bilər. "Şahdəniz-2" layihəsi çərçivəsində qazma işlərinin qrafiki müəyyənləşdirilib və bu layihənin reallaşdırılması üçün yuxarıda adı çəkilən iki qazma qurğu kifayətdir".
Onun sözlərinə görə, "Şahdəniz-2" layihəsi çərçivəsində 20-dən artıq quyunun qazılmasına dair planlara baxmayaraq, iki platformanın tikintisi iqtisadi cəhətdən məqsədəuyğundur.
İctimai dinləmələr zamanı vurğulanıb ki, "Şahdəniz-2" layihəsi çərçivəsində hasilat öz pik nöqtəsinə 2022-ci ildə çatacaq və 7-8 il ərzində davam edəcək.
Qazma işlərinin 5 klasster vasitəsilə həyata keçirilməsi planlaşdırılır və bütün proses 2022-ci ildə yekunlaşacaq. İlk qazın artıq 2018-ci ildə hasil ediləcəyi planlaşdırılır.