Azərbaycan, Bakı, 4 iyun /Trend, müxbir E.İsmayılov/
Azərbaycanın "Azəri-Çıraq-Günəşli" dəniz neft yataqları blokunun işlənməyə başladığı vaxtdan indiyədək oradan 360 milyon ton neft hasil olunub. Trend-in məlumatına görə, bunu ARDNŞ-nin (Azərbaycan Respublikası Dövlət Neft Şirkəti) prezidenti Rövnəq Abdullayev çərşənbə günü Bakıda XXI Azərbaycan Beynəlxalq Xəzər Neft və Qaz-2014 (Caspian Oil&Gas) beynəlxalq konfransında deyib.
Onun sözlərinə görə, göstərilən dövrdə blokdan 96 milyard kubmetr qaz hasil olunub.
Abdullayev qeyd edib ki, proqnozlara görə, blokda neft hasilatının illik həcmi 34-35 milyon ton təşkil edəcək.
ARDNŞ rəhbərinin sözlərinə görə, 2015-ci ildə Azərbaycanda qaz hasilatının həcmi (laylara vurulan qaz həcmləri nəzərə alınmadan) 20 milyard kubmetr olacaq. 2020-ci ildə isə bu göstərici 40 milyard kubmetrə çatacaq.
AÇG blokunun işlənməsi üzrə müqavilə 1994-cü ildə imzalanıb. Müqavilə 30 il qüvvədədir. Yatağın sübut edilmiş neft ehtiyatları təxminən bir milyard ton həcmində qiymətləndirilir.