Azərbaycan, Bakı, 14 avqust /Trend, müxbir Emil İsmayılov/
2014-cü ilin yanvar-iyul aylarında Bakı-Tbilisi-Ceyhan (BTC) boru kəməri ilə 20,9 milyon ton neft nəql edilib. 2013-cü ilin eyni dövründə bu rəqəm 19,4 milyon ton təşkil edib. Trend-in məlumatına görə, bu barədə Dövlət Statistika Komitəsinin (DSK) 2014-cü ilin 7 ayının yekunu üzrə hesabatında deyilir.
Hesabatda qeyd edilir ki, yanvar-iyul aylarında ölkənin magistral neft kəmərləri üzrə nəql edilmiş bütün neftin 3/4-ü BTC-nin payına düşüb.
2013-cü ildə BTC üzrə 33 milyon ton, 2012-ci ildə isə 32,9 milyon ton neft nəql edilib.
DSK-nın məlumatına görə, hesabat dövründə ümumilikdə ölkənin magistral neft kəmərləri üzrə 27,6 milyon ton neft nəql edilib ki, bu da 2013-cü ilin yanvar-iyul ayları ilə müqayisədə 10 faiz çoxdur.
Hesabata əsasən, yanvar-iyul aylarında Cənubi Qafqaz qaz kəməri üzrə (Bakı-Tbilisi-Ərzurum) 3,6 milyard kubmetr qaz tədarük edilib. 2013-cü ilin eyni dövründə bu göstərici 2,5 milyard kubmetr olub.
2013-cü ildə Cənubi Qafqaz qaz kəməri üzrə 4,7 milyard kubmetr, 2012-ci ildə isı 4 milyard kubmetr qaz nəql edilib.
Yanvar-iyul aylarında ölkənin magistral qaz kəmərləri ilə 12,7 milyard qaz nəql olunub. Bu, ötən ilin analoji dövründəki rəqəmdən 9,3 faiz çoxdur.
