Azərbaycan, Bakı, 15 avqust /Trend, müxbir Emil İsmayılov/
2014-cü ilin I yarısında Bakı-Tbilisi-Ceyhan (BTC) neft kəmərində əsaslı xərclərə 61,3 milyon dollar ayrılıb. 2013-cü ilin yanvar-iyun aylarında bu rəqəm 26 milyon dollar təşkil edib. Trend-in məlumatına görə, bu barədə BP-nin 2014-cü ilin I yarımilliyinin yekunları üzrə hesabatında deyilir.
2014-cü il üçün əsaslı xərclərin 119 milyon dollar olması gözlənilir. 2013-cü ildə bu göstərici 97 milyon dollar təşkil edib.
Hesabata görə, I yarımillikdə neft kəmərində əməliyyat xərclərinin həcmi 100 milyon dollar olub. Proqnozlara əsasən, 2014-cü ilin nəticələri üzrə bu göstərici 230 milyon dollara çatacaq.
2006-cı ilin iyun ayından indiyədək neft kəməri üzrə 263 milyon ton neft (təqribən 2 milyard barel) ixrac edilib. Cari ilin I yarısında neft kəməri üzrə 17,8 milyon ton (134 milyon barel) neft nəql edilib.
BTC neft kəmərinin ümumi uzunluğu 1768 kilometrdir (443 kilometr Azərbaycan, 249 kilometr Gürcüstan, 1076 kilometr isə Türkiyə əraizindən keçir). Boru kəmərinin tikintisinə 2003-cü ilin aprelində başlanılıb. Onun neftlə doldurulması isə 18 may 2005-ci il tarixinə təsadüf edir.
BTC Ko.-nun səhmdarları: BP (30,1%); AzBTC (25.00%); Şevron (8,90%); Statoyl (8,71%); TPAO (6,53%); ENİ (5.00%); Total (5.00%), İTOÇU (3,40%); İNPEKS (2,50%), KonokoFillips (2,50%) və ONGC (BTC) limited (2,36%) şirkətləridir.
