Azərbaycan, Bakı, 18 sentyabr /Trend, müxbiur Emil İsmayılov/
ARDNŞ (Azərbaycan Respublikası Dövlət Neft Şirkəti) "Azneftyağ" neft emalı zavodundan köhnə bitum qurğusunun Heydər Əliyev adına Bakı Neft Emalı Zavoduna köçürülməsindən imtina edib.
Bu barədə Trend-ə ARDNŞ-dəki yüksək vəzifəli məmur bildirib.
Əvvəllər şirkət "Azneftyağ" neft emalı zavodunun sökülməsi çərçivəsində əlvan neft məhsulları istehsal edən bitum qurğusunun Bakı NEZ-ə köçürülməsinin mümkünlüyünə baxırdı.
ARDNŞ nümayəndəsinin sözlərinə görə, bu variantın araşdırılması onun səmərəsizliyini göstərdi.
Lakin bu, "Azneftyağ" NEZ-in işinin dayandırılmayacağı demək deyil. Zavod tədricən bağlanacaq, lakin həmin vaxta kimi Bakı NEZ-də yeni istehsalat qurğuları təşkil olunacaq. Yəni bitum istehsal edəcək yeni qurğu quraşdırlacaq. Yeni istehsalatın təşkilinə investisiya proqramının bəyənildiyi andan 4 il vaxt tələb olunur.
ARDNŞ nümayəndəsi bildirib: "Əsas məsələ təkcə bitum istehsalının təşkili deyil, həm də Avro-5 ekoloji standartlarına uyğun benzin və dizel yanacağının istehsalının təmin olunmasıdır".
Bu layihənin reallaşdırılacağı müddət maliyyələşmə prosesindən asılı olacaq. Maliyyə mənbələri və bu layihənin Dövlət Neft Şirkətinin öz şəxsi vəsaitləri hesabına həyata keçirilməsinin mümkünlüyündən danışan ARDNŞ nümayəndəsi qeyd edib ki, Dövlət Neft Şirkəti hazırda iri layihələr həyata keçirir və belə işlərin öz vəsaitləri hesabına aparılması onun üçün kifayət qədər ağır maliyyə yükü ola bilər. Layihənin maliyyələşdirilməsi ilə bağlı məsələ müvafiq nazirlik və dövlət strukturlarının iştirakı ilə ölkə hökumətində baxılmasından sonra həll olunacaq. Daha sonra razılaşdırılmış qərar təsdiqlənmək üçün dövlət başçısına göndəriləcək.
ARDNŞ nümayəndəsinin sözlərinə görə, "Azneftyağ" NEZ-in bitum qurğusunun dayandırılması ölkənin bu neft məhsuluna olan tələbatının təmin olunmasına heç bir təsir göstərməyəcək, çünki bitum istehsalı prosesi fasiləsiz həyata keçiriləcək.
Azərbaycanda neft məhsulları ildə 16 milyon ton neft emal edən Bakıdakı iki NEZ-də istehsal edilir. Hər iki NEZ Dövlət Neft Şirkətinin tərkibinə daxildir. Şirkət hər il quruda və dənizdəki yataqlarında şəxsi vasitələri hesabına əldə edilən təxminən yeddi milyon ton neft emal edir. Ötən il Azərbaycanda 5,09 milyon ton əsas neft məhsulları istehsal edilib.
