Azərbaycan, Bakı, 26 noyabr /Trend, müxbir Emil İsmayılov/
Azərbaycanda benzinə olan tələbat həm daxili resurslar, həm də idxal hesabına tam təmin olunur. Bu barədə çərşənbə axşamı Trend-ə ölkədə neft məhsullarının yeganə istehsalçısı olan ARDNŞ-dəki (Azərbaycan Respublikası Dövlət Neft Şirkəti) mənbə məlumat verib.
Bu il ARDNŞ respublikada benzinə artan tələbatın təmin olunması çərçivəsində 2014-cü ilin yazından Aİ-95 markalı benzinin istehsalını dayandırdı və tamamilə ölkədə daha çox tələbat olan Aİ-92 markalı benzinin istehsalına keçdi. Hazırda ölkədə 95 oktan ədədli benzinə tələbat idxal hesabına təmin olunur. ARDNŞ ölkədən benzin ixracını minimum səviyyəyə endirərək bütün həcmləri daxili tələbatın təmin olunmasına yönəldib.
Mənbənin sözlərinə görə, Aİ-92 markalı benzinə tələbat ölkədəki istehsal güclərinin hesabına tam təmin edilir, daha yüksək oktan ədədli benzin isə respublikaya idxal olunur.
Dövlət Statistika Komitəsinin məlumatına görə, 2014-cü ilin yanvar-oktyabr aylarında Azərbaycanda 1,02 milyon ton avtomobil benzini istehsal olunub ki, bu da 2013-cü ilin analoji dövründəkindən 12,5 faiz azdır. Halbuki bu neft məhsuluna tələbat təkcə yanvar-sentyabr aylarında 5,6 faiz artıb.
İstehsal həcmlərinin azalması bu ilin yazında Heydər Əliyev adına Neft Emalı Zavodunda əsaslı təmir işlərinin aparılması və bəzi qurğuların yenilənməsi ilə izah edilir. Mənbə bildirib: "Respublikanın Aİ-92 markalı benzinə tələbatı təmin olunur, istehsal həcmlərinin azalması isə bu il zavodda aparılan təmir işləri ilə əlaqədar ola bilər".
Azərbaycanda neft məhsulları Bakının iki neft emalı zavodunun bazasında istehsal edilir. Hər iki zavodun birgə gücü ildə 16 milyon ton neft təşkil edir.