Bakı. Trend:
Noyabrın 19-da Şamaxı, Zərdab, İmişli və Saatlı rayonlarının daha 6 kəndinə təbii qaz verilib.
Trend SOCAR-ın saytına istinadən məlumat verir ki, tədbirlərdə rayon İcra hakimiyyətlərinin və "Azəriqaz" İstehsalat Birliyinin təmsilçiləri, ictimaiyyət nümayəndələri iştirak ediblər.
Şamaxı rayonunda keçirilmiş tədbirdə bildirilib ki, rayonun 146 abonentlik Avaxlı kəndinin ilk dəfə qazlaşdırılması məqsədilə birpilləli sistem əsasında 20 864 metr uzunluğunda müxtəlif diametrli metal borularla daşıyıcı və məhəllədaxili qaz xətləri çəkilib, 146 ədəd sayğac və fərdi tənzimləyici quraşdırılıb.
Həmin gün saatlılar üçün də əlamətdar olub. Belə ki, Saatlı rayonunun Potubəyli kəndinə ilk dəfə təbii qaz verilib. Bununla əlaqədar keçirilmiş tədbirdə qeyd olunub ki, 211 abonenti olan kəndin qazlaşdırılması zamanı birpilləli sistem əsasında 19 205 metrlik qaz xətləri çəkilib, hər bir abonent üçün ayrıca sayğac və fərdi tənzimləyici quraşdırılıb.
İmişli rayonunda keçirilən tədbirdə isə vurğulanıb ki, ümumilikdə 940 abonentlik Qaralar və Cavadxanlı kəndlərinin ilk dəfə qazlaşdırılması məqsədilə 78 074 metr uzunluğunda müxtəlif diametrli polietilen və metal borularla daşıyıcı və məhəllədaxili qaz xətləri çəkilib, 940 ədəd sayğac və fərdi tənzimləyici quraşdırılıb.
Zərdab rayonunun Qoruqbağı və Sarıqaya kəndlərinə təbii qazın verilişinin bərpa edilməsi münasibətilə keçirilmiş tədbirdə bildirilib ki, ümumilikdə 432 abonenti olan kəndlərin qazlaşdırılması üçün birpilləli sistem əsasında 34 866 metr uzunluğunda müxtəlif diametrli metal borularla daşıyıcı və məhəllədaxili qaz xətləri çəkilib, abonentlərin mənzillərində sayğac və fərdi tənzimləyicilər quraşdırılıb.
Çıxış edənlər kəndlərə təbii qazın verilməsinə görə Azərbaycan Prezidenti İlham Əliyevə minnətdarlıqlarını bildiriblər.
Trend-in ən mühüm və maraqlı xəbərlərini "Telegram"da izləyin
.jpg)
