Azərbaycanın quruda yerləşən "Kürovdağ" yatağının reabilitasiyası, kəşfiyyatı və işlənməsi ilə məşğul olan Shirvanoil MM müqavilə sahəsində qazma işlərini PSA tipli müqaviləyə keçid məsələsi həll olunduqdan sonra davam etdirəcək. Bu barədə Trend ə ARDNŞ-dən məlumat verilib.
"Kürovdağ"ın cənub hissəsində qazma işlərini Böyük Britaniyanın Monument Oil servis şirkəti həyata keçirəcək.
İyulda ARDNŞ-də "Şirvan oil" müştərək müəssisəsinin əsas fondlarından istifadə hüququnun "Shirvanoil" ƏŞ-yə verilməsi məsələləri ilə məşğul olacaq işçi qrupu yaradılıb.
İşçi qrupu ARDNŞ, Caspian Energy Group şirkəti və ARDNŞ-in afillasiya edilmiş şirkəti ilə imzalanmış, "Kürovdağ" neft yatağına daxil olan blokun bərpası, işlənməsi və hasilatının bölünməsi haqqında müqavilə üzrə vacib olan bütün əməliyyatları həyata keçirəcək.
Müqaviləyə görə, müəssisədə iştirak payının 50%-i ARDNŞ-ə və Caspian Energy Group şirkətinə məxsusdur. Nəzərdə tutulan sərmayələrin həcmi $200-$300 mln təşkil edir.
2005-ci ilin sonlarınadək Shirvanoil "Kürovdağ"ın işlənməsinə $40 mln-dan çox sərmayə qoyub.
2004-cü ilin noyabrında ARDNŞ Caspian Energy Group (keçmiş Whitehall) şirkəti ilə "Kürovdağ" üzrə PSA tipli müqavilə imzalayıb. PSA müqaviləsində tərəflərin hər biri 50% iştirak payı alıb. 1997-ci ildən "Kürovdağ"ın reabilitasiyası ilə Caspian Energy Group şirkətinin 51% iştirak payına malik olduğu Shirvan Oil MM məşğul olub.
"Kürovdağ" yatağı 1929-cu ildə açılıb. Yatağın işlənilməsi üzrə işlərə 1955-ci ildə başlanıb. Bu gün 36 mln tondan çox neft hasil edilib. Shirvan Oil MM-in payına (1997-ci ildən bəri) 1,6 mln tondan çox neft düşüb.
