Qazaxıstan neftinin Bakı-Tbilisi-Ceyhan kəməri ilə çatdırılması və onun Azərbaycanın yüngül nefti ilə qarışması dünya bazarında "Azeri Light"a olan marağı azaltmayacaq. Azərbaycanın neft sənayesi sahəsindəki ekspertlərin Trend ə verdiyi məlumata görə, BTC kəmərinə yalnız neft spesifikası BTC-nin keyfiyyət bankının minimal tələblərinə cavab verən yük göndərənlər buraxılacaq.
"Bu, yalnız Qazaxıstan neftinə deyil, digər ölkələrin neftlərinə də şamil olunacaq. Boruda "Azeri Light" sortu ilə qarışan neft elə keyfiyyətdə olmalıdır ki, Ceyhan limanına çatdıqda alınmış "Caspian Blend" sortu da, təmiz halda olan Azərbaycanın yüngün nefti kimi, Avropa neft emalçıları üçün cəlbedici olsun", - deyə ekspertlər bildiriblər.
Beləliklə, Qazaxıstan BTC-yə qoşulduqdan sonra, BP Aralıq dənizində Azərbaycanın yüngül neftinin satış bazarını itirməyəcək.
BTC boru kəməri ildə 50 mln. tondan artıq nefti ötürmək qabiliyyətinə malik olacaq. Hal-hazırda boru kəməri ilə yalnız Azərbaycanın "Azəri-Çiraq-Günəşli" yataqlarından hasil olunmuş yüngül neft nəql olunur. Gələcəkdə isə BTC ilə Qazaxıstanın "Tengiz" və "Kaşaqan" yataqlarından çıxarılmış neft də ötürüləcək.
BTC Co. şirkəti tərəfindən təşkil olunmuş neftin keyfiyyət bankı Ceyhan limanında boru kəmərindən çıxan neftin keyfiyyətini tənzimləyəcək və yük göndərənlər arasında müxtəlif keyfiyyətli neftin qarşılıqlı yoxlanılması mexanizmini təqdim edəcək.