Azərbaycanın şimalında "Xaçmaz" (330 kV) yarımstansiyasının inşası üzrə tenderin qalibi olmuş Çinin CNEEC şirkəti gələn ilin I rübündə layihənin texniki-iqtisadi əsaslandırılmasını hazırlayacaq. Daha sonra şirkət layihənin gerçəkləşdirilməsinə başlayacaq. Bu barədə Trend ə "Azərenerji" SC-nin vitse-prezidenti Marlen Əsgərov məlumat verib.
"Azərenerji" SC bu şirkətlə təxminən $16 mln. dəyərində müqavilə imzalayıb.
Tender proseduru məsləhətçi "Darl-handasa" konsaltinq şirkəti ilə birgə keçirilib. 6 iddiaçı - Simens (Almaniya), ABB (İsveçrə-İsveç), Areva (Fransa), Sunir və NEC (İran), o cümlədən CNEEC (Çin) şirkətləri öz təkliflərini irəli sürüb.
Xaçmaz rayonunda 330 kilovoltluq müasir yarımstansiyanın inşası 2004-2008-ci illərdə regionların sosial-iqtisadi inkişafı və 2005-2015-ci illərdə yanacaq-energetika kompleksinin inkişafı üzrə dövlət proqramlarına daxil edilib. İİB layihənin gerçəkləşdirilməsi üçün 12 il müddətinə və illik 6%-lə 13,508 mln. dollar kredit ayırıb.
"Xaçmaz" yarımstansiyası enerji sisteminin manevr etmə qabiliyyətinin artırılması baxımından da böyük əhəmiyyət kəsb edir. Yarımstansiya Rusiya ilə enerji mübadiləsinin həyata keçirildiyi Yaşma-Dərbənd EÖX-dən təchiz olunacaq. Hazırda belə yarımstansiyanın olmaması ilə əlaqədar "Azərenerji" Yaşmada RF-dən elektrik enerjisi alaraq şimal bölgələrini təchiz etmək üçün onu yenidən sərhədə nəql etməyə məcburdur. Perspektivdə regionda paylama funksiyalarının yeni yarımstansiyanın öhdəsinə buraxılması, yerdə qalan həcmin isə Bakının təchiz olunmasına yönəldilməsi nəzərdə tutulur.
