Azərbaycan, Bakı/ Trend / İlin birinci rübündə Azərbaycan Dövlət Neft Şirkətinin "Kompleks qazma işləri" tresti 45 250 metr qazıb ki, bu da ötən ilin müvafiq dövründən 85,7 faiz (proqnozdan 7200 metr) çoxdur. Bu barədə trestin baş geoloqu Mehman Yusifov bildirib. İstismara 15 quyu verilib.
Trest yeniləşdirmə işləri apararaq yeni qazma texnologiyalarının tətbiqi ilə müasir qazma şirkətinə çevrilmək və regiondakı qazma tenderlərində iştirak etmək niyyətindədir.
"Kompleks qazma işləri" tresti Dövlət Neft Şirkətində "Bayıl Limanı" dəniz kəşfiyyat qazma idarəsinin bazasında mart ayında yaradılıb və ARDNŞ-in qazma strukturlarını özündə birləşdirir.
Yusifov bildirib ki, qazmadan sonra Azərbaycan Dövlət Neft Şirkəti 62 yeni quyu istismara alıb və bu quyulardan 252 min ton neft və kondensat hasil olunub.
Ötən il qazılmış 4 qaz quyusundan isə 159 mln. kubmetr qaz çıxarılıb.
