Azərbaycan, Bakı / Trend / Azərbaycanın Dövlət Neft Şirkəti (ARDNŞ) iyunda "Günəşli-11" platformasının genişləndirilməsi işini yekunlaşdırmaq və iyulun 1-dən ilk quyunun qazılmasına başlamaq niyyətindədir. Bu barədə ARDNŞ-in "Kompleks qazıntı işləri" tresinin baş geoloqu Mehman Yusifov məlumat erib.
Bu quyunun qazılması oktyabrın sonunadək yekunlaşmalıdır. İlin sonuna kimi həmin platformada daha iki quyunun qazılması planlaşdırılır.
"Günəşli" yatağının dayaz hissəsində yerləşən platformada genişləndirmə və yenidənqurma işləri bitdikdən sonra kondensat hasilatı 55 min ton, qaz hasilatı 700 mln. kubmetr artacaq.
Platforma 105 metr dərinlikdə yerləşir. Buradakı genişləndirmə işləri 1390 kv.m əhatə edəcək. Ümumilikdə genişləndirilmiş blokda səkkiz yeni quyunun qazılması planlaşdırılır. Onların hamısı qaz hasilatına yönələcək. Blokun ağırlığı 1060 ton, hündürlüyü isə 113 metr təşkil edir. Platforma və blok körpü vasitəsilə birləşdiriləcək.
