Azərbaycan,Bakı/müxbir Trend S.Əliyev/Azərbaycan Dövlət Neft Şirkəti (ADNŞ) yaxın zamanlarda Ceyhan limanından öz neftinin birbaşa tədarükü ilə bağlı bir neçə müqavilə bağlamaq niyyətindədir. Bu barədə ADNŞ-in Marketinq və İqtisadi Əməliyyatlar İdarəsinin rəhbəri Muxtar Babayev məlumat verib.
O, şirkətlərin adını açıqlamayıb və qeyd edib ki, ADNŞ Aralıq dənizi ölkələrinin şirkətləri ilə də analoji müqavilələr imzalamaq niyyətindədir.
"Gələcəkdə analoji müqavilələrin ABŞ və Uzaq Şərq şirkətləri ilə də imzalanması mümkündür" - deyə o bildirib.
Hazırda ADNŞ birbaşa neft tədarükünə dair bir şirkətlə - Tailandın "PTT" şirkəti ilə müqaviləyə malikdir. 2007-ci ilin birinci rübündə ADNŞ və "PTT" ililk müqavilə imzalayıb. Müqaviləyə əsasən, Azərbaycan Tailandın neft emalı zavodlarına təxminən 1 mln. barel neft çatdıracaq.
Azərbaycan "PTT" üçün FOB və CFR şərtləri ilə yüngül neft tədarük edəcək.
Dövlət Neft Şirkəti yüngül nefti 1994-cü ildə imzalanmış "Əsrin müqaviləsi" çərçivəsində "Azəri-Çıraq-Günəşli" yatağında hasil edir.
