Azərbaycan, Bakı /müx. Trend S.Əliyev/ Cümə günü "Azəri-Çıraq-Günəşli" layihəsi çərçivəsində aparılan tikinti işləri ilə bağlı keçirilən brifinqdə "BP"nin vitse-prezidenti Bryus Lyuberski bildirib ki, avqust ayında Xəzərin Azərbaycan sektorunda "Günəşli" yatağının dərin su hissələrində qazıntı işləri məqsədilə yaşayış bloku və texniki təminat qurğuları ilə birlikdə qazıntı platformasının yuxarı hissəsi quraşdırılacaq.
Onun sözlərinə görə, sentyabr ayında "Günəşli" yatağının dərin su hissələrinə kompressor platformasının yuxarı qurğuları, texnoloji işləmələr, texniki təminat göndəriləcək.
"Mərhələ-3" çərçivəsində dəniz layihəsi üzrə "BP"nin meneceri Kerl Kerni brifinqdə bəyan edib ki, sentyabr ayında "Günəşli" yatağının dərin su hissələrində qabaqlayıcı quyuların yenidən qazılmasına başlanılacaq.
"Əgər əvvəllər "Azəri" yatağında qabaqlayıcı qazıntı proqramı çərçivəsində qabaqlayıcı quyu neft hövzəsinə qədər qazılıb konservasiya edilirdisə, "Günəşli" yatağının dərin su hissələrində isə hövzəyə qədər təxminən əlavə1000 metr qazmaq lazım gələcək" - deyə Kerni bildirib.
2008-ci ilin may ayında "Günəşli" yatağının dərin su hissələrində neft hasilatı başlanacaq. Bu vaxta qədər yataqda dörd quyu hazır olacaq.
"2007-ci ilin sonuna qədər "Azəri" yatağı çərçivəsində və "Günəşli" yatağının dərin su hissələrində tikinti işləri başa çatdırılacaq" - deyə Lyuberski bildirib.
"Azəri-Çıraq-Günəşli" layihəsi çərçivəsində "Çıraq", "Azəri", "Günəşli" yatağı və "Günəşli" yatağının dərin su hissələri işlənir. Layihənin operatoru "BP" şirkətidir.
