Azərbaycan, Bakı /müx. Trend İ.Xəlilova/ Azərbaycan İnvestisiya Şirkətinin (AİŞ) icraçı direktoru Anar Axundovun verdiyi məlumata görə, şirkət Amerikanın "Nexand" şirkəti ilə "Səngəçal-Qaradağ neft-qaz terminalı"nın tikintisi layihəsinə qoyulacaq investisiyaların yekun həcmi ilə bağlı müzakirələri davam etdirir. "Müzakirələr zamanı layihənin dəyərinin artırılmasından söhbət açılıb. İstisna edilmir ki, layihəyə əvvəlcə qoyulması planlaşdırılan 90 mln. dollar həcmində investisiya artırıla bilər. Biz effektivlik nöqtəsi tapmalıyıq və "Nexand" məbləğin artırılması səbəbini və bunun terminalın gücünün genişləndirilməsi ilə əlaqəsini əsaslandırmalıdır" - deyə Axundov bildirib.
AİŞ-in Müşahidə Şurasının 29 iyun qərarına əsasən, investisiya şirkəti terminala 9 mln. dollar investisiya yatırıb.
AİŞ və "Qafqaztransservis" arasında imzalanmış müqaviləyə əsasən, şirkət yatırılmış vəsaitlər hesabına "Səngəçal-Qaradağ neft-qaz terminalı"nın nizamnamə kapitalının 25%-ni əldə edəcək. AİŞ həmçinin layihənin əsas səhmdarı olan "Qafqaztransservis" müəssisəsinə terminalın tikintisi məqsədilə kredit resursların cəlb edilməsi işində hər cür yardım göstərir.
İslam İnkişaf Bankı, Avropa Yenidənqurma və İnkişaf Bankı və digər maliyyə strukturları ilə danışıqlar aparılır.
İnvestisiya layihəsinin əsas məqsədi Bakının Qaradağ rayonu ərazisində neft-qaz terminalının tikintisidir. Bu terminalın tikintisi ilə Qazaxıstan və Türkmənistandan xam neftin alınması planlaşdırılır və bu neft "Bakı-Tbilisi-Ceyhan" neft kəməri ilə Qara dəniz sahilinə və Ceyhan limanına daşınacaq.
Birinci mərhələdə terminalın gücü 12 mln. ton təşkil edəcək və gələcəkdə gücün 40 mln. tona çatdırılması planlaşdırılır.
