Azərbaycan, Bakı, 26 fevral / Trend , S.Babayeva/ Azərbaycan Milli Elmlər Akademiyasının İnformasiya Texnologiyaları İnstitutu "Azərpoçt" ilə əməkdaşlıq etmək marağındadır. Bu barədə institutun direktoru Rasim Əliquliyev məlumat verib.
"Azərpoçt" rəhbərliyi və institut əməkdaşlarının görüşündə institutun "Azərpoçt"un müxtəlif texnoloji proseslərdə və avtomatlaşdırmada iştirakı məsələləri müzakirə olunub.
İnstitutun mütəxəssisləri dövlət müəssisəsi və Dünya Bankı ilə birgə həyata keçirilən "Maliyyə xidmətlərinin inkişafı" layihəsi haqqında məlumatlandırılıblar. Həmçinin yeniliklərlə, mərkəzi poçt şöbəsinin 1 saylı poçt filialı ilə, poçt daşıma mərkəzi və DM-nin inzibati binasındakı digər avadanlıqlarla tanış olublar.
İnformasiya Texnologiyaları İnstitutunun əsas məqsədi yeni informasiya texnologiyaları əsasında müxtəlif sahələrin məlumatlandırılmasıdır. Buna yeni intellektual kompüter şəbəkələri və sistemlərinin yaradılması, informasiya təhlükəsizliyinin təmin edilməsi daxildir.
