Azərbaycan, Bakı,14 aprel / Trend , müxbir S.Babayeva/ Azərbaycanda birinci rübdə mobil rabitə abunəçiləri 4,4 mln. nəfər təşkil edib. Bu barədə bazar ertəsiAzərbaycanın Rabitə və İnformasiya Texnologiyaları nazirliyindən məlumat verilib.
Mobil rabitə istifadəçiləri ilin əvvəli ilə müqayisədə 100 min nəfər artıb. Belə ki, Azərbaycanda hər 100 nəfərdən 51-i mobil rabitə abunəçisidir.
Hazırda Azərbaycanda üç GSM mobil rabitə operatoru fəaliyyət göstərir. Bazarda ən böyük pay
üç milyondan artıq abunəçisi olan "Azercell Telecom"un payına, 700 min "Bakcell"in və 500 mindən artıq abunəçi isə "Azerfon" BM-in payına düşür.
Hökumətin proqnozlarına görə, 2008-ci ildə Azərbaycanda mobil rabitə abunəçilərinin sayı 5,2 mln. nəfərə çatacaq. 2009-cu ildə bu göstərici 5,9 mln., 2010-cu ildə 6,2 mln. və 2011 -ci ildə isə 6,8 mln. nəfər olacaq.