Azərbaycan, Bakı, 25 iyun/ Trend , müxbir S.Babayeva/ Azərbaycanın informasiya texnologiyaları sahəsində çalışan strukturları, oktyabrda İstanbulda keçiriləcək CeBIT Bilisim Eurasia-2008 çərçivəsində, türkdilli ölkələr üçün İT forumunaa dəvət ediliblər. Bu barədə sərginin təşkilatçısı Hifas Hannover Fairs-Interpro İnternational Fairs İnc. -in Baş direktorunun köməkçisi Hakan Çələbi məlumat verib.
"Forum ətrafında Azərbaycanla yanaşı, Qırğızıstan, Türkmənistan, Özbəkistan, Qazaxıstan və Türkiyədən mütəxəssislər topalaşacaq", - Çələbi söyləyib.
Görüşün məqsədi bu ölkələrdə İT-nin vəziyyətinin müzakirəsi, təcrübə mübadiləsi və əməkdaşlığın genişləndirilməsi imkanlarıdır.
"Bu şirkətlər bizneslərini inkişaf etdirmək və informasiya texnologiyaları sahəsində ən yeni işləmələr haqqında məlumat almaları üçün yaxşı imkandır", - Çələbi bildirib.
Hifas Hannover Fairs-in nümayəndəsi Bakıya səfəri çərçivəsində artıq rabitə və informasiya texnologiyaları nazirinin müavini Elmir Vəlizadə ilə görüşüb, bundan əlavə, onun özəl şirkətlərlə görüşü planlaşdırılıb.
CeBIT Bilisim Eurasia Türkiyə, Cənub-Qərbi Asiya və Qara dəniz regionu ölkələri üzrə dünyada informasiya və kommunikasiya texnologiyalarının iri sərgilərindən biridir.
