Azərbaycan, Bakı, 25 noyabr / Trend , müxbir S.Babayeva/ İnternet ən müxətlif məlumatlara ani çıxış imkanı verir. Unutmaq olmaz ki, bu məlumat uşaq üçün xeyirli ola bildiyi kimi, zərərli də ola bilər. Çərşənbə axşamı Microsoft Azerbaijan-ın Baş direktoru Teymur Axundov "İnternetdə uşaqların təhlükəsizliyi" pilot layihəsinin təqdimat mərasimində söyləyib.
"Uşaqları təcavüzkar xarakterli məlumatlardan qorumaq lazımdır. Təəssüf ki, İnternetdə belə məlumatlar var", - Axundov deyib.
Microsoft Azerbaijan "İnternetdə uşaqların təhlükəsizliyi" layihəsini Təhsil Nazirliyi və Azərbaycan İnternet Forumu ilə birgə realizə edir. Bu layihə Microsoft-un bütün dünyada həyata keçirdiyi Child Safety Online qlobal proqramının bir hissəsidir.
Layihənin məqsədi ictimaiyyətin diqqətini uşaqları mümkün mənfi informasiyanın təsirindən qorumaq üçün, onların İnternetdən təhlükəsiz istifadəsi probleminə çəkməkdir. Layihənin gedişində xüsusi təlim materialları - plakatlar və kitablar hazırlanıb. Müəllimlər, valideynlər və uşaqlar bu materiallarda İnternetdən təhlükəsiz istifadə qaydaları və tövsiyələrlə tanış ola bilərlər. Layihənin dəyəri barədə məlumat verilmir.
Microsoft nümayəndəliyi 2006 - cı ilin fevralından Azərbaycanda fəaliyyət göstərir. Nümayəndəliyin qarşısında duran əsas vəzifələr proqram təminatının satışı və tərəqqisi, informasiya texnologiyaları bazarının inkişafı, Azərbaycan ərazisində yeni texnologiyaların tətbiqi və lokallaşdırılmasıdır.
Müəlliflə əlaqə ünvanı: [email protected].
