Azərbaycan, Bakı, 02 fevral / Trend , müxbir S.Babayeva/ Azərbaycanın özəl provayderləri ölkədə genişxətli İnternet xidmətlərinə olan tariflərin azaldılması üzrə təkliflər hazırlayıb və Rabitə və İnformasiya Texnologiyaları Nazirliyinə təqdim ediblər, - Azərbaycanın İnternet Birliyindən (AİB) bazar ertəsi bildiriblər.
"Ötən həftə daha bir görüş keçirdik və provayderlər hazırlanmış təklifləri razılaşdırdılar", - İnternet Birliyindən qeyd ediblər.
Rabitə Nazirliyinə təqdim olunmuş təkliflərə ADSL-in qiymətinin iki dəfə azaldılması üçün texniki imkanlar üzrə təxminən 10 bənd daxildir.
"Azərbaycanda genişxətli İnternetə olan tariflər region üçün orta hesab edilsə də, ölkənin işgüzar fəallığı və iqtisadi inkişafını nəzərə alaraq, qiymətlər daha aşağı ola bilər", - rabitə naziri Əli Abbasov əvvəllər bildirmişdi.
Nazirin proqnozlarına görə, fevralda ölkədə İnternet xidmətlərinin qiymətləri xeyli azaldılmalıdır.
Dövlət provayder şirkətləri - Bakinternet və Aztelekom.Net artıq ADSL xidmətlərinə olan qiymətlərin iki dəfə azaldıldığını elan ediblər. Yeni tariflər fevralın 1-dən qüvvəyə minib.
Azərbaycanda 30-dan çox İnternet-provayder şirkəti və bir milyondan çox istifadəçi var.
Müəlliflə əlaqə saxlamaq üçün elektron ünvan: [email protected]
