Azərbaycan, Bakı, 12 iyun / Trend , müxbir А.Bədəlova /
"Təhsil Nazirliyi "2008-2012-ci illər üçün təhsil sisteminin informasiyalaşdırılması üzrə dövlət proqramı" çərçivəsində, ölkənin yeddi min tədris müəssisəsinin yüksək sürətli internetə qoşulması məqsədini nəzərdə tutur", - cümə günü Azərbaycanın təhsil naziri Misir Mərdanov deyib.
"Mən belə qısa müddət ərzində bu həcmdə işin yerinə yetirilməsini müsbət qiymətləndirirəm. Ancaq əsas iş hələ qabaqdadır", - Mərdanov bildirib.
Onun sözlərinə görə, birinci ili üçün 18 milyon dollar ayrılan Dövlət proqramı çərçivəsində Bakının və ölkənin müxtəlif regionlarının 200 məktəbi yüksək sürətli internetə qoşulub.
Azərbaycan Prezidenti İlham Əliyev "2008-2012-ci illər üçün təhsil sisteminin informasiyalaşdırılması üzrə dövlət proqramı"nı 2008-ci ilin iyununda imzalayıb.
Proqramın məqsədi müasir texnologiyaların geniş tətbiqi və əhalinin bütün təbəqələrinin keyfiyyətli təhsil almaq imkanlarının təmin edilməsi yolu ilə ölkədə vahid ümummilli təhsil mühitini yaratmaqdır.
Təhsil müəssisələrinin maddi-texniki bazasının yaxşılaşdırılması, kompüter avadanlığı ilə təchizatı, internet şəbəkəsinin hazırlanması və internetə çıxış, bütün fənlər üzrə elektron elmi-metodik ləvazimatların, elektron təhsil vəsait bazasının (e-learning), təhsildə İKT-nin tətbiqi sahəsində informasiya və vəsait bazası mərkəzinin, vahid təhsil portalının yaradılması, ölkədə məsafəli təhsilin inkişafı, təhsil menecment sisteminin informasiyalaşdırılması, kadr potensialının gücləndirilməsi və normativ-hüquqi bazanın təkmilləşdirilməsi üzrə tədbirlərin görülməsi dövlət proqramının tədbirlər planına daxildir.
Məqalə müəllifi ilə əlaqə ünvanı: [email protected]