Azərbaycan, Bakı, 30 iyun / Trend , müxbir Q.Vəliyev /
"Delta Telecom şirkəti ilin sonuna qədər WiMAX (Worldwide Interoperability for Microwave Access) mobil şəbəkəsinin kommersiya istismarının buraxılışını həyata keçirməyi planlaşdırır", - çərşənbə axşamı Trend -a Delta Telecom-un baş direktoru Ramazan Vəliyev deyib.
Onun sözlərinə görə, hazırda layihənin birinci mərhələsi üzərində işlər başa çatdırılır. Onun çərçivəsində Bakı və Abşeron yarımadasında Baza Stansiyalarının (BS) qurulması həyata keçiriləcək. Layihənin ilin sonuna qədər realizə ediləcək ikinci mərhələsi WiMAX şəbəkəsinin regional səviyyədə genişləndirilməsini nəzərdə tutur.
Bakı və Abşeron yarımadasında qurulmuş BS-lərin sayı 110 ədəd, regionlar üzrə 140 ədəd təşkil edəcək. Şəbəkənin buraxılış gücü 4,4 Qbit/s olacaq.
Delta Telecom-un WiMAX şəbəkəsi həmçinin Mobile WiMAX adı altında tanınan və 120 km/saat sürətlə hərəkət edən mobil qurğular üçün nəzərdə tutulmuş 802.16e standartına əsaslanacaq.
Şəbəkə Delta Telecom-la 2008-ci ilin sentyabrında müqavilə imzalayan Alcatel-Lucent avadanlığının bazasında tikilir.
Vəliyevin sözlərinə görə, gələcəkdə WiMAX şəbəkəsi LTE (Long-Term Evolution) texnologiyası ilə inteqrasiya ediləcək. Bu, Azərbaycanda ən sürətli mobil genişzolaqlı çıxış şəbəkəsinin gələcək genişlənməsi yolunda vacib addım olacaq. LTE mobil genişzolaqlı çıxışı verilənlərin fövqəlyüksək sürətlərlə ötürülməsi hesabına keyfiyyətcə yeni səviyyəyə qaldırmaq imkanı verəcək. Bu xidmətlərə internet televiziya, mobil videobloqlar, şəbəkə oyunları və b. hallarda ehtiyac duyulur.
