Azərbaycan, Bakı, 28 avqust / Trend , müxbir H.Vəliyev /
"Link&A şirkəti Azərbaycan Maliyyə Nazirliyində "Günəş Sistemi" mühasibat uçotu sisteminin tətbiqinə başlayıb", - Trend -a Link&A şirkətinin direktoru Ənvər Həmidov deyib.
Həmidovun sözlərinə görə, mühasibat uçotunun avtomatlaşdırılması üçün proqram təminatı nazirliyin sifarişi ilə milli mühasibat uçotu standartları əsasında hazırlanıb. Bu sistem uçot prosesinin bütün sahələrini əhatə edir və istənilən mülkiyyət formasına malik müəssisə və təşkilatlarda mühasibat uçotunu aparmağa imkan verir. Proqram təminatı bütün uçot növlərini (ümumi mühasibat, anbar, istehsalat, əməyin ödənilməsi uçotu, əsas vəsaitlərin uçotu və onların amortizasiyası, gəlir və xərclərin büdcələnməsi (planlaşdırma) və onların yerinə yetirilməsi, ilkin sənədləşdirmə və b.) əhatə edir.
Bu gün sistem ölkənin 1500 şirkət və müəssisələrindən çoxunda uğurla istismar olunur. Gələcəkdə bu sistemin respublikanın digər büdcə təşkilatlarında da tətbiqi nəzərdə tutulub. Büdcə təşkilatları üçün proqram təminatı pulsuzdur.
Artıq Azərbaycanda kommersiya sektoru üçün 28 milli standart hazırlanıb. Dünyada maliyyə hesabatlılığı və auditin 35 standartı var. Ölkədə Mühasibat Uçotunun Beynəlxalq Standartlarına (IFRS) keçid dövlət sektoru üçün 2008-ci il yanvarın 1-dən başlayıb.
Ancaq Nazirlər Kabinetinin təsdiq etdiyi siyahıya əsasən, 20 ictimai əhəmiyyətli təşkilat 2008-ci ilin yanvarın 1-dək öz mühasibat uçotunu və maliyyə hesabatlılığını IFRS-ə uyğun həyata keçirməli idilər.
Belə təşkilatlar aktivlərinin 100 milyon manatı ötməsi, illik gəlirlərinin beş milyon manat, əməkdaşlarının sayının isə min nəfərdən artıq olması ilə seçilməlidir.
Bu meyarlara uyğun gələn təşkilatlar aşağıdakılardır: ARDNŞ, "Azərenerji", "Bakıeletrikşəbəkə", ARDNŞ-nin neft kəmərləri, Marketinq və İqtisadi əməliyyatlar idarələri, "Azneft" İB, H.Əliyev adına və "Azneftyağ" neft emalı zavodları, "ADDY, Bakı metropoliteni, "Azal" QSC və onun milli aviasiya şirkəti, Xəzər Dəniz Gəmiçiliyi, "Azəriqaz", "Azəriqaznəql", "Azərsu", "Aztelekom" İB, "Azərkimya" dövlət şirkəti və onun tərkibinə daxil olan etilen-polietilen zavodu.
Ölkənin dövlət müəssisələri ilə yanaşı, bir çox özəl müəssisələr də indiyə qədər mühasibat uçotunun sovet standartlarına əsaslanırdı. Bu günədək yalnız bank təşkilatları tam şəkildə yeni hesabat planına keçib. 2004-cü ilə qədər onlar Mərkəzi Banka iki - beynəlxalq və yerli standartlarla hesabat təqdim edirdilər.
"Mühasibat uçotu haqqında" qanuna əsasən 2007-ci ilin sonuna qədər kommersiya təşkilatlarında beynəlxalq standartlar əsasında qəbul edilmiş milli mühasibat uçotu standartlarının tətbiqi başa çatdırılmalı idi. Bununla əlaqədar olaraq, milli mühasibat uçotu standartlarının tətbiqi üzrə dövlət proqramında 2005-08-ci illərdə standartların tətbiqedilmə növbəliliyi göstərilib. Büdcə və qeyri-hökumət təşkilatlarına 2008-ci ilin sonuna, kiçik və orta müəssisələrə isə 2006-cı ilin 1 yanvar tarixinə qədər vaxt qoyulmuşdu. Ən uzun müddət bələdiyyələr, büdcə təşkilatları, dövlət fondları üçün - 2009-cu ilin 1 yanvar tarixinə qədər vaxt verilmişdi. Təcrübədə isə bu proses gecikir.
Məqalə müəllifi ilə əlaqə ünvanı: [email protected]
