Azərbaycan, Bakı, 04 sentyabr / Trend , müxbir H.Vəliyev /
Azərbaycan Milli Elmlər Akademiyasının Fizika İnstitutu Dubna şəhərində (Rusiya) keçiriləcək təsis qurultayının işində iştirak edəcək. Qurultayda MDB ölkələrində nanotexnologiyalar üzrə innovasiya mərkəzinin yaradılması barədə qərar qəbul ediləcək. Bu barədə Trend -a Fizika İnstitutunun yüksək enerjili fizika laboratoriyasının müdiri Hövsət Abdinov bildirib.
Təsis qurultayının keçirilməsi noyabr ayında gözlənilir. Qurultayın keçirilməsi barədə qərar iyul ayının əvvəlində Dubnada keçirilən "MDB ölkələrində nanotexnologiyalar üzrə innovasiya mərkəzinin yaradılması" informasiya forumu zamanı qəbul edilib.
Ehtimal olunur ki, xüsusi iqtisadi zona ərazisində nanotexnologiyalar sahəsindəki layihələr üzərində MDB-nin bütün ölkələrindən aparıcı alimlər işləyəcək.
Avropada aparıcı olmaq üçün bütün imkanlara malik olan mərkəz Birləşmiş Nüvə Tədqiqatları İnstitutu və Kurçatovsk İnstitutunun bazasında yaradılacaq.
Abdinovun sözlərinə əsasən, Dubnada mərkəzin tərkibinə daxil olan bütün ölkələrin əldə edəcəyi məlumatın resurs bankı yaradılacaq. Mərkəzin iştirakçısı olaraq Azərbaycan həm MDB ölkələrində, həm də bütün dünyada nanotexnologiyalar sahəsində baş verən hadisələrdən xəbərdar olacaq.
Hazırda "Silikon Vadi"yə bənzər iki mərkəzin inşası həyata keçirilir. Birinci mərkəzin fəaliyyət istiqaməti kompüter texnologiyaları ilə bağlı olacaq, ikinci mərkəzin vəzifələrinə isə nanotexnologiyalar sahəsində tədqiqatlar aiddir. Dubnada nanotexnologiyalar mərkəzi bilavasitə bu şəhərdə ekspertizadan keçən iştirakçı ölkələrin tədqiqatlarının koordinatoru qismində çıxış edəcək.
Məqalə müəllifi ilə əlaqə ünvanı: [email protected]
