Azərbaycan, Bakı, 04 sentyabr / Trend , müxbir H.Vəliyev /
Azərbaycan Milli Elmlər Akademiyasının Kibernetika İnstitutu "Anshad Petrol" və "Binagadi Oil" neft şirkətlərində proqnozlaşdırma üzrə monitorinq sisteminin tətbiqinə başlayacaq. Bu barədə Trend -a institutun İnnovasiya və informasiya texnologiyaları laboratoriyasının müdiri Qəmbər Quliyev deyib.
Onun sözlərinə görə, müəssisələrdə sözügedən texnologiyanın istifadəsi inkişafın başlanğıc mərhələsində mikroqəzaların əvvəlcədən müəyyən edilməsinə imkan verəcək. Sistem həmçinin elektrik enerjisi xərclərini 70 faizədək azaltmağa imkan verir. Bu da hasilatın maya dəyərinə müsbət təsir göstərir.
Monitorinq sistemi ötürücülər vasitəsilə küləyin sürəti, təzyiq, temperatur, sürət, məsafə və s. barədə siqnal (informasiya) almağa imkan verir. Hər siqnalda müəyyən əngəllər olur və bunlara uyğun olaraq xoşagəlməz insidentlərin proqnozlaşdırılmasına imkan verilir.
Kibernetika İnstitutu böyük iqtisadi və sosial zərərlərə gətirə biləcək obyektlərin proqnozlaşdırılmasının nəzəri əsaslarını işləyir. Sözügedən texnologiyanın aviasiya, neft və digər sektorlarda istifadəsi qəza vəziyyətlərini sıfıra endirməyə imkan verəcək. Qazma və ya uçuş prosesində çoxlu küylər və əngəllər qeydə alınır. İnformasiya daşıyıcısı kimi bu əngəllərdən istifadə ilə qəza vəziyyətini proqnozlaşdırmaq olar.
Bu il monitorinq sistemi "Shirvan Oil" və "Balaxanıneft" NQÇİ yataqlarında istismara tətbiq edilib. Sentyabrın 20-dək "Karasu operating company"-də sınaq işləri başa çatdırılacaq.
Məqalə müəllifi ilə əlaqə ünvanı: [email protected]
