Azərbaycan, Bakı, 29 oktyabr / Trend , müxbir H.Vəliyev/
Hazırda həyata keçirilən Black Sea Interconnection (BSI) layihəsi çərçivəsində Azərbaycanın pan-Avropa tədqiqat şəbəkəsinə qoşulması azərbaycanlı tədqiqatçıların regional və Avropa ölkələrindən olan həmkarları ilə əməkdaşlığını gücləndirəcək. Bu barədə BSI layihəsinin koordinatoru Murad Soysal jurmnalistlərlə söhbətində bildirib.
Onun sözlərinə görə, Cənubi Qafqaz regionunda tədqiqat və tədris şəbəkələri arasında beynəlxalq şəbəkə infrastrukturunun yaradılması və onun GEANT2 pan-Avropa tədqiqat şəbəkəsinə qoşulmasına 1,2 milyon avrodan çox vəsait ayrılıb, büdcənin 80 faizi Avropa komissiyası (1,4 milyon avro), qalan 20 faizi isə Cənubi Qafqaz ölkələri tərəfindən maliyyələşdiriləcək.
Hazırda rəqəmsal mühitin genişlənməsi üzrə işlər aparılır və növbəti ilyarım üçün daimi büdcə müəyyən ediləcək. Soysalın sözlərinə görə, layihənin şərtlərinə müvafiq olaraq, növbəti mərhələdə Cənubi Qafqaz ölkələrinin maliyyələşmə həcmi 50 faizədək artacaq.
Azərbaycan hazırda tədqiqat şəbəkəsi resurslarının cəmi 30 faizindən istifadə edir. Layihənin həyata keçirilməsi nəticəsində isə bu göstərici 100 faizədək artacaq.
Layihə Qafqaz regionunda cəmləşdirilib. Şəbəkə Azərbaycan, Gürcüstan və Ermənistanın öz aralarında birləşməsini, həmçinin bu ölkələrin GEANT2 şəbəkəsinə qoşulmasını təmin edir.
GEANT2 şəbəkəsi Avropanın 30 milli tədqiqat və 34 Avropa ölkəsinin təhsil şəbəkələrini birləşdirir. Şəbəkənin dünyanın digər regionları ilə də əlaqələri var.
GEANT2 şəbəkəsi yüksək buraxılış qabiliyyətinə malikdir və tədqiqatlar zamanı qlobal əməkdaşlıq üçün şərait yaradır.
Məqalə müəllifi ilə əlaqə ünvanı: [email protected]
