Azərbaycan, Bakı, 13 noyabr / Trend , müxbir H.Vəliyev/
Azərbaycan Milli Elmlər Akademiyasının Respublika Seysmoloji Mərkəzi (RSM) Mingəçevir, Saatlı, Qazax və Lerikdə seysmik stansiyaların quraşdırılmasına dair işləri başa çatdırıb. Bu barədə cümə günü RSM-nin baş direktorunun müavini Azay Rzayev Trend -a deyib.
Rzayevin sözlərinə görə, onları Bakıda yerləşən baş mərkəzə birləşdirmək üçün əlaqə kanallarının ayrılması gözlənilir. Avadanlıqlar Amerikanın Kinemetrics şırkətindən alınıb. Korporativ şəbəkə Delta Telecomla xidmət edəcək.
Bu gün Azərbaycanın 14 rayonunda seysmoloji mərkəz fəaliyyət göstərir. Respublikanın seysmik cəhətdən aktiv olan məntəqələrində quraşdırılmış peyklər vasitəsilə real zaman şəraitində vibrasiyalı sensorlardan məlumatı müntəzəm qəbul edən baş mərkəz Bakıda yerləşir. Məlumat əldə edildikdən sonra sistem zəlzələnin dəqiq yeri, gücü və zamanı barədə məlumat verir.
Rzayevin sözlərinə görə, RSM-in 2010-2011-ci illər üzrə planında daha doqquz stansiyanın quraşdırılması nəzərdə tutulur. Təklif müzakirə üçün Azərbaycan Nazirlər Kabinetinə təqdim edilib və büdcənin qəbulundan sonra planın sonrakı həyata keçirilməsinin şərtləri müəyyən olunacaq. Ordubad, Şərur, Qəbələ, Qobustan, Astara və digər rayonlarda da stansiya açmaq planlaşdırılır. Hər bir stansiyanın dəyəri 200 min dollar təşkil edir.
Məqalə müəllifi ilə əlaqə ünvanı: [email protected]