Azərbaycan, Bakı, 17 noyabr / Trend , müxbir H.Vəliyev/
Azərbaycanda "Xalq kompüteri" layihəsinin ikinci mərhələsi başlayıb. Bu barədə Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin müdri Rüfət Gülməmmədov Trend -a bildirib.
Layihənin ikinci mərhələsində müəllimlər, ali təhsil müəssisələrinin tələbləri və tibb işçiləri üçün kompüter və noutbukların satılması nəzərdə tutulur.
Birinci "Xalq kompüteri" pilot layihəsi çərçivəsində 3500 personal kompüter satılıb, onun da böyük əksəriyyətini (90 faiz) portativ kompüterlər təşkil edib.
"Xalq kompüteri" pilot layihəsinə aprel ayında start verilib. Pilot layihə çərçivəsində beş min mini-nout (MiniNote), noutbuk və stolüstü kompüterlər ayrılıb.
"Xalq kompüteri" pilot layihəsi çərçivəsində təklif edilən kompüterlər müəllimlər üçün nəzərdə tutulub. Layihə 12 ay müddətinə faizsiz, bazar qimətindən 25-40 faiz aşağı qiymətlərlə satışı nəzərdə tutur.
Layihə HP və Microsoft şirkətlərinin iştirakı ilə həyata keçirilib. Kompüterlərin təchizatı HP-nin yerli tərəfdaşı Bestcomp Group şirkətinə aiddir.
Layihə çərçivəsində kompüterləri internet vasitəsilə əldə etmək üçün elektron kommersiya sistemi http://www.xalqkomp.az/ fəaliyyət göstərib.
Məqalə müəllifi ilə əlaqə ünvanı: [email protected]
