Azərbaycan, Bakı, 04 mart / Trend , müxbir H.Vəliyev/
Martın 4-də ABŞ-ın Beynəlxalq İnkişaf Agentliyi (USAID) və "Microsoft Azərbaycan" şirkəti arasında qeyri-qanuni proqram təminatından istifadənin azaldılması məqsədi ilə alyansın yaradılması, eləcə də Azərbaycanın inkişaf edən informasiya texnologiyaları sektorunda innovasiya, satış artımı və yeni iş yerlərinin yaradılmasını dəstəkləmək məqsədi ilə Anlaşma Memorandumu imzalanıb.
"Biz bu tərəfdaşlığı dəstəkləməkdən məmnunuq, dövlət və özəl sektor arasında həyata keçiriləcək bu tərəfdaşlığın müsbət nəticələrini səbirsizliklə gözləyirik", - USAID-in Azərbaycandakı iqtisadi şöbəsinin rəhbəri Şila Yanq bildirib.
Kompüter piratlığına qarşı alyansın - USAID və "Microsoft Azərbaycan" şirkəti tərəfindən dəstəklənən proqram təminatında piratlığa qarşı alyansın məqsədi Azərbaycanda proqram təminatı sahəsində piratlığa qarşı mübarizə aparmaqdır. IDC (International Data Corporation) şirkəti tərəfindən 2008-ci ildə aparılmış araşdırmanın nəticələrinə əsasən, Azərbaycanda piratlığın səviyyəsi 90 faiz təşkil edir ki, bu da dünyada ən yüksək göstəricilərdən biridir. Qeyri-qanuni proqram təminatından istifadə Azərbaycanda fəaliyyət göstərən müəssisələri və istehlakçıları riskə məruz qoyur, eləcə də İT sektoruna zərər vurur. Proqram təminatına qarşı alyans öz fəaliyyətinə Azərbaycan Respublikası Mərkəzi Bankının auditorlarına kommersiya banklarında və ümumilikdə, müəssisələrdə aparılan yoxlamalar zamanı lisenziyasız proqram təminatının aşkar edilməsi üzrə təlim keçməklə başlayacaq. Layihənin növbəti mərhələlərində qeyri-qanuni proqram təminatından istifadə nəticəsində böyük və ortaölçülü müəssisələrin üzləşdiyi risklər əsas diqqət mərkəzində olacaq.
"Biz Azərbaycanda həyata keçirilən piratlığa qarşı vaxtında bu təşəbbüsü dəstəkləməkdən məmnunuq. Hazırda biz bazarda müsbət meyilləri müşahidə edirik və ümid edirik ki, layihənin uğuru müvafiq biznes meyilləri üçün düzgün strukturun formalaşmasına kömək edəcək", - "Microsoft Azərbaycan" şirkətinin baş direktoru Teymur Axundov bildirib.
Alyansın məqsədi qeyri-qanuni proqram təminatından istifadənin səviyyəsini 10 faiz azaltmaqdır. İkinci təsirlərin lisenziyalı proqram təminatının satışını 10 milyon dollar artırması, təxminən 20 milyon dollar həcmində iqtisadi dövriyyəni stimullaşdırması, 3.6 milyon dollar əlavə gəlir vergisinin və ən azı 900 yeni iş yerlərinin yaranmasına səbəb olacağı proqnozlaşdırılır.
USAID tərəfindən bu alyansa dəstək özəl sektorun rəqabətliliyinin gücləndirilməsi layihəsi çərçivəsində həyata keçirilir. Layihənin məqsədi Azərbaycan iqtisadiyyatının qeyri-neft və qaz sektorlarında rəqabət qabiliyyətinin gücləndirilməsidir. Hədəf olaraq seçilmiş altı sektora informasiya texnologiyaları, balıqçılıq, maliyyə, südçülük, quşçuluq, meyvə və tərəvəz sektorları daxildir.