Azərbaycan, Bakı, 15 aprel /Trend, müxbir H.Vəliyev/
"Azerspace" milli telekommunikasiya peykinin istehsalçısı ilə müqavilənin imzalanması bu ayın sonlarında gözlənilir. Bunu Trend-ə cümə axşamı rabitə və informasiya texnologiyaları nazirinin müavini İltimas Məmmədov deyib.
"Azerspace" peykinin istehsalçısı ABŞ-ın Orbital Sciences Corporation şirkətidir.
Nazirin sözlərinə görə, qarşı tərəf müqavilənin şərtlərinə yenidən baxmaq üçün əlavə vaxt istəyib və bununla əlaqədar imzalanma haqqında yekun qərarın bu ayın sonuna kimi qəbul olunması gözlənilir.
Rabitə və informasiya texnologiyaları naziri Əli Abbasovun verdiyi məlıumata görə, yaxın vaxtlarda orbital mövqenin icarəsi üzrə müqavilənin imzalanması, həmçinin peykin sığortası ilə məşğul olacaq şirkətin və peykin orbitə çıxarılması üçün daşıyıcı raketin müəyyən olunması gözlənilir.
Nazirliyin planlarına görə, ilk peykin orbitə buraxılması 2012-ci ilin iyununda gözlənilir.
Əvvəlcə peykin buraxılmasının ABŞ-ın "Falkon" daşıyıcı raketinin bazasında həyata keçirilməsi nəzərdə tutulurdu. Lakin Amerika layihəsi yubandığından nazirlik peykin "Zenit" daşıyıcı raketi bazasında çıxarılması üçün "Ukroboronservis" ilə danışıqlar aparır.
Bununla paralel olaraq, nazirliyin qarşısında duran prioritet məsələlərdən biri peyk resurslarının həyata keçirilməsidir. Xəbər verildiyi kimi, Malayziya peyk resurslarının 40 faizini almağa hazır olduğunu bildirib. Ümumilkdə, nazirlik beynəlxalq bazara "Azerspace"in resurslarının 80 faizini çıxarmaq, qalan 20 faizindən isə respublikadaxili səviyyədə istifadə etmək niyyətindədir.
Nazirliyin məlumatına görə, peykin qiyməti 163 milyon manatdan çoxdur. Peykin inşası 87 milyon manata başa gələcək. 40 milyon manat onun orbitə buraxılmasına sərf olunacaq. Peykin idarə edilməsi mərkəzi 16 milyon manat təşkil edəcək. Qalan 18 milyon manat onun 100 faizlik sığortasına sərf ediləcək.
Rabitə peykinin orbitə çıxarılması Azərbaycanın kosmik sənaye ölkəsinə çevrilməsi üzrə perspektiv layihələrin həyata keçirilməsində ilk addım olacaq.