Azərbaycan, Bakı, 27 may /Trend, müxbir Q.Vəliyev/
Yaxın illərdə Azərbaycanın kontent xidmətlər bazarı xüsusi əhəmiyyət kəsb edəcək. Bu haqda Trend-ə "Nokia Siemens Networks" şirkətinin Azərbaycanda, Gürcüstanda və Türkmənistandakı regional direktoru Aleksandr Boqomolov deyib.
Onun sözlərinə görə, hazırda istifadəçilər üçün təklif edilən kontentlər çox zəif, keyfiyyətsiz və qeyri-qaneedicidir.
"İnternetin gələcəyi hər şeydən əvvəl sürətin, məlumatın həcminin və kontentin artırılmasıdır. Və burada kontent-provayderlər və kontent xidmətlərinin işlənilib- hazırlanması ilə məşğul olan ixtisaslaşdırılmış şirkətlər üçün çox böyük fəaliyyət imkanları açılır. Hesab edirəm, bir neçə ildən sonra əla bazar kontentin müxtəlif modifikasiyası və növlərinin seçimi üçün imkanlar yaradacaq. Bu kontentlər isə tələbat və zövqdən asılı olaraq, istehlakçılar tərəfindən geniç istifadə olunacaq", - Boqomolov deyib.
Boqomolovun sözlərinə görə, mobil rabitə şəbəkəsində tətbiq edilən yeni texnologiyalar genişzolaqlı internetə əsaslanaraq, istifadəçilərə keyfiyyətli servisdən yararlanmağa imkan yaradacaq. Bu internet növünün üstünlüklərini bir çoxları bilir və bütün dünya buna görə genişzolaqlı internetə üstünlük verir.
