Azərbaycan, Bakı, 17 iyun /Trend, müxbir H.Vəliyev/
BMT-nin Azərbaycanın "Şərq-Qərb" transmilli informasiya supermagistralının yaradılması layihəsi üzrə qəbul etdiyi qətnamə, onun həyata keçirilməsi ilə bağlı problemlərin aradan qaldırılmasında mühüm rol oynayır. Bunu rabitə və informasiya texnologiyaları naziri Əli Abbasov Azərbaycan Diplomatik Akademiyasında çıxışı zamanı deyib.
Abbasovun sözlərinə görə, layihənin həyata keçirilməsinə təsir edən başlıca faktor hazırkı daxili siyasi vəziyyət və regionun bəzi ölkələrində demokratiyanın olmamasıdır.
"Şərq-Qərb" informasiya supermagistralının yaradılması üzrə Azərbaycanın irəli sürdüyü təşəbbüs BMT tərəfindən Baş Assambleyanın 64-cü sessiyasının 66-cı iclasında qəbul edilib. "İnformasiya uçurumunu" aradan qaldıracaq, yoxsulluq səviyyəsini aşağı salacaq, iqtisadi artımı artıracaq və regionun inkişafı üçün lokomotiv rolunu oynayacaq layihəyə öz dəstəyini bildirən BMT, layihənin həyata keçirilməsi məqsədilə regionun bütün ölkələrini lazımi tədbirlər görməyə çağırıb.
"Hazırda dünyada əsas informasiya strukturu iki regionda inkişaf edir. Birincisi, Şimali Amerika və Qərbi Avropa, ikincisi, Sakit okean hövzəsi ölkələridir. Təəssüf ki, Qara dənizdən Sakit okeanadək yerləşən ölkələrdə bu sahədə xeyli geridəqalma müşahidə edilməkdədir ki, bu da zəif infrastruktur və elektron tutumunun azlığı ilə bağlıdır, bu da öz növbəsində Qərb ölkələrində saxlanılır. Azərbaycanın təşəbbüskarı olduğu "Şərq-Qərb" layihəsi, ilk növbədə, mövcud problemi qlobal şəbəkə infrastrukturu yaratmaqla aradan qaldırmaq və Qərbi Şərqlə birləşdirmək məqsədini güdür", - Abbasov vurğulayıb.
Layihə ümumilkdə 20 ölkəni birləşdirəcək və regionun inkişafında mühüm rol oynayacaq. Layihənin həyata keçirilməsi Qərbi Avropa və Sakit okean hövzəsinə daxil olan ölkələr arasındakı "uçurumu" aradan qaldırmağa imkan verəcək.
