Azərbaycan, Bakı, 4 avqust /Trend, müxbir H.Vəliyev/
Azərbaycanın elektron ATS-lərinin ümumi çəkisi 92,1 faizə çatıb. Bu barədə Rabitə və İnformasiya Texnologiyaları Nazirliyinin altı ayın yekunları üzrə hazırlanan hesabatında deyilir.
Nazirliyin qiymətləndirməsinə görə, paytaxtda bu göstərici 85,65 faiz, respublikanın digər regionları üzrə 95,3 faiz təşkil edib ki, bu da ilin əvvəli ilə müqayisədə beş faiz çoxdur.
Kənd elektron ATS-lərinin səviyyəsi iyulun əvvəlinə 85,1 faiz (1,1 faiz artım) olub.
Respublika üzrə elektron ATS-lərinin artım həcmi ilin əvvəlindən 4,8 faiz təşkil edib.
Yatırılan investisiyaların və telefon şəbəkəsinin modernləşdirilməsi sayəsində telefon aparatlarının ümumi sayı 14 mindən çox artırılıb (nazirlik üzrə 11,5 min ədəddən çox) və 1,4 milyon ədədi ötüb (nazirlik üzrə 1,26 milyondan çox).
Hazırda hər 100 nəfərin payına düşən telefonların ümumi sayı 16,1 ədəd təşkil edir. Paytaxt üzrə bu göstərici 34,5 ədəd, respublikanın digər regionları üzrə 10,7 ədəd, kənd yerlərində 7 ədəddir.
GSM standartlı mobil rabitə operatorlarının abonent bazası altı ayın yekunlarına əsasən, 742 880 abonent artaraq 8,5 milyon abonent təşkil edib. Azərbaycanda mobil rabitənin nüfuz səviyyəsi 94 faizə çatıb. Nazirliyin proqnozlarına görə, bu, ilin sonunadək 100 faizlik həddə çatdırılacaq.
"Bakı Telefon Rabitəsi" və "Aztelekom" istehsalat birliklərində CDMA standartlı simsiz stasionar rabitənin abonentlərinin sayı ilin əvvəlindən 1526 nəfər artaraq 27 mini keçib.