Аzərbaycan, Bakı, 30 avqust /Trend, müxbir H.Vəliyev/
İlin sonuna qədər İsveçrənin İqtisadi Əlaqələr Dövlət Katibliyi (SECO) "Maliyyə xidmətlərinin inkişafı" layihəsinin davamı olaraq, Azərbaycanın poçt rabitəsi operatoru "Azərpoçt" MMC-yə texniki yardım göstərəcək. Bu barədə bazar ertəsi Trend-ə Rabitə və İnformasiya Texnologiyaları Nazirliyi poçt rabitəsi şöbəsinin müdiri Novruz Məmmədov deyib.
Layihənin əvvəlindən etibarən, SECO-nun iştirak payı 500 min dollar təşkil edib."Maliyyə xidmətlərinin inkişafı" layihəsi 2005-ci ildən Ümumdünya Bankının dəstəyi ilə Azərbaycan hökuməti tərəfindən həyata keçirilir. 2009-cu ilə qədər onu tamamlamaq planlaşdırılırdı, lakin texniki işlər təyin olunmuş müddətə qədər başa çatmadığına görə, layihənin vaxtı daha bir il uzadılıb.
Bu gün, əsasən, poçt rabitəsi şöbəsinin avtomatlaşdırılması və onların avtomatlaşdırılmış korporativ-informasiya sisteminə qoşulması üzrə işlər aparılır. Məmmədovun sözlərinə görə, poçt operatorunun avtomatlaşdırılmış korporativ-informasiya sisteminə nəzərdə tutulmuş 1 200 poçt rabitəsi şöbəsinin artıq 700-ü qoşulub. Filial və şöbələr sisteminə qoşulan 200 şöbə əhaliyə maliyyə xidməti göstərilməsi üzrə Azərbaycan Mərkəzi Bankından artıq icazə alıb.
Operatora 7 maliyyə xidmətindən 5-ni təqdim etməyə icazə verilib. Onlara poçt hesablarının açılması və idarəsi, pul köçürmələrinin həyata keçirilməsi, debit kartlarının emissiyası, müştərilərin sifarişi üzrə valyuta alışı və satışı əməliyyatları və pul vəsaitlərinin inkassasiyası aiddir.
Növbəti il daha iki əlavə xidmətin göstərilməsi məsələsinə baxılacaq - bu, depozitlərin qəbulu və kredit kartlarının emissiyasıdır.
"Azərpoçt" Azərbaycanın bank bazarında güclü rəqabət imkanlarına malikdir. Bu gün Azərbaycanın bank bazarında 47 bank fəaliyyət göstərir, filialların ümumi sayı 500-ü, "Azərpoçt"un poçt şöbələrinin sayı isə 1 600-ü ötür.
