Azərbaycan, Bakı, 11 yanvar /Trend, müxbir H.Vəliyev/
Azərbaycanın Təhsil Nazirliyi ölkənin məktəbəqədər, orta təhsil və məktəbdənkənar təhsil müəssisələrinin məlumat bazasını yaratmağı planlaşdırır. Bu barədə Trend-ə çərşənbə axşamı Təhsil Nazirliyinin Təhsil sistemində idarəetmənin informasiyalaşdırılması (TIMS) şöbəsinin direktoru İsmayıl Sadıqov məlumat verib.
Sadıqovun sözlərinə görə, işlər başa çatdırıldıqdan sonra məlumat bazası təhsil müəssisələri arasında məlumat mübadiləsi üçün vahid təhsil şəbəkəsinə birləşdiriləcək.
"2010-cu ilin sonlarında təhsil şəbəkəsinə qoşulan təhsil müəssisələrinin sayı minə çatıb ki, bunun 900-ə yaxını orta təhsil müəssisələri, yerdə qalanı isə texniki-peşə məktəbləridir. Bu il bu rəqəmi daha 500 ədəd artırmağı planlaşdırırıq. Təhsil sisteminin informasiyalaşdırılması Dövlət Proqramı çərçivəsində müəyyən edilən məqsədlərə görə, respublikanın bütün təhsil müəssisələri 2012-ci ilin sonunadək təhsil şəbəkəsindən istifadə edə biləcəklər. Bu gün həmin şəbəkənin olmadığı məktəblərdə məlumat mübadiləsi elektron poçt vasitəsilə həyata keçirilir. Bu il ucqar ərazilərdə yerləşən və simli qoşulmanın mümkün olmadığı təhsil müəssisələrində simsiz şəbəkə tətbiq ediləcək", - Sadıqov bildirib.
Azərbaycanın orta təhsil müəssislərinin şagirdlərinin sayı 1,5 milyon nəfərə çatır, bütün respublika üzrə bu müəssisələrin əməkdaşlarının ştatı 168 min nəfərdir. Şagirdlər və müəllimlər barədə bütün məlumatlar məktəblərə məlumat bazalarının bütün sistemini avtomatlaşdırmağa imkan verən təhsil sistemində idarəetmənin informasiyalaşdırılması -TİMS-də öz əksini tapıb.
TİMS əsasında məktəblərin məlumat bazaları müəllimlər və şagirdlər, təhsil müəssisəsinin strukturu, dərs proqramları və planları və s. barədə ətraflı məlumatları özündə birləşdirir.
Elektron məlumat bazasının yaradılması məktəblərdən Təhsil Nazirliyinə bilavasitə birbaşa məlumat axınına şərait yaradır.
Bu gün başlıca məsələ orta təhsil müəssisəsinin kompüterləşdirilməsi və İnternet şəbəkəsinə qoşulmaq üçün zəruri şəraitin yaradılmasıdır. Güzəştli əsaslarla proqram məhsullarının zəruri miqdarda lisenziyalı versiyasını ayırmağa hazır olduğunu bildirən Microsoft-un yerli nümayəndəliyi ilə razılaşma da mövcuddur.
2010-cu ildə məktəblərin kompüterləşdirilməsinə və müəllimlər üçün təlimlərin keçirilməsinə 16 milyon manata yaxın vəsait xərclənib. İşlər 2008-2012-ci illərdə Azərbaycanda TİMS Dövlət Proqramı çərçivəsində aparılıb.
Layihənin əsas məqsədi İT-dən istifadə olunmaqla və ölkənin dünya təhsil sisteminə inteqrasiyası yolu ilə təhsilin keyfiyyətinin yüksəldilməsi üçün vahid təhsil informasiya mühitinin yaradılmasıdır. Bu, ilk növbədə ölkədəki təhsil sistemini effektiv idarə etməyə, eləcə də İnternet şəbəkəsi vasitəsilə xarici ölkələrin təhsil müəssisələrilə əlaqə saxlamağa imkan verəcək.