Azərbaycan, Bakı, 11 yanvar /Trend, müxbir H.Vəliyev/
Azərbaycan dövlət poçt rabitəsi operatoru "Azərpoçt" MMC Azərbaycanda poçt ticarətinin tətbiqi imkanlarını nəzərdən keçirir. Bu barədə Trend-ə Azərbaycan Rabitə və İnformasiya Texnologiyaları Nazirliyindən çərşənbə axşamı məlumat verilib.
Poçtla ticarət universal ticarətin yeni formasıdır, əsas vəzifəsi alınan malların haqqının poçt rabitəsi şöbələrində ödənilməsi imkanından ibarətdir.
Məsafəli ticarət müasir poçt operatorlarının biznesinin inkişafında ən perspektivli istiqamətlərindən biridir. Ticarətin bu növünün perspektivliliyi internet şəbəkəsinin proqressiv inkişafı və istifadəçilərin kommersiyada informasiya texnologiyalarının tətbiqinə yüksək hazırlığından irəli gəlir.
Bu gün dünya poçt xidməti sahənin aktual tendensiyalarına uyğun yenidən formalaşır və dəyişən iqtisadi şəraitlərə və öz fəaliyyətində yeni texnologiyaların tətbiqinə uyğunlaşır.
Azərbaycanda poçt ticarəti xidmətinin tətbiqinin başlıca cəhəti idxal olunan malların gömrük sənədləşdirilməsi prosedurunun sadələşdirilməsi üzrə məsələlərin razılaşdırılmasıdır. Çünki xaricdəki ünvandan respublika ərazisindəki digər ünvana göndərilən beynəlxalq poçt bağlamaları idxal olunan mal kimi sənədləşdirmə prosedurundan keçməlidir.
