Azərbaycan, Bakı, 14 yanvar /Trend, müxbir H.Vəliyev/
Rabitə və İnformasiya Texnologiyaları Nazirliyi Azərbaycanın İT şirkətlərinin beynəlxalq bazara çıxışına kömək etməyə hazırdır. Bu barədə cümə günü rabitə və informasiya texnologiyaları nazirinin müavini Elmir Vəlizadə Xəzər-Avropa İşgüzar Klubunun (CEIBC) iclası çərçivəsində bildirib.
Vəlizadənin sözlərinə görə, ötən il nazirliyin dəstəyi ilə yerli İT şirkətlərinin "Cebit" (Almaniyada), "Cebit Bilişim" (Türkiyədə), "TurkmenTel" (Türkmənistan), Özbəkistanda təşkil olunan milli sərgidə və ötən il nazirin Kubaya səfəri çərçivəsində təşkil olunan sərgidə iştirakı təmin olunub.
"Bu gün yerli şirkətlərin potensialı onların beynəlxalq bazarlara çıxışına imkan verir və biz şirkətləri bu tədbirlərdə iştiraka dəvət edirik", - Vəlizadə bildirib.