Azərbaycan, Bakı, 21 yanvar /Trend, müxbir H.Vəliyev/
2010-cu ilin yekunlarına görə, Azərbaycanın orta təhsil müəssisələrinə iki minə yaxın personal kompyuter tədarük edilib. Bu barədə cümə günü Təhsil Nazirliyinin Təhsil sistemində idarəetmənin informasiyalaşdırılması (TIMS) şöbəsinin direktoru İsmayıl Sadıqov məlumat verib.
Sadıqovun sözlərinə görə, ötən il məktəblərin kompyuterləşdirilməsinə 16 milyon manat həcmində vəsait sərf olunub. Bu məbləğin xeyli hissəsi 500 məktəbin yüksəksürətli İnternet şəbəkəsinə qoşulmasına və müəllimlər üçün təlimlərin keçirilməsinə yönəldilib.
"Yaxın vaxtlarda biz təhsil müəssisələrinin kompyuter təchizatının monitorinqini keçirməyi planlaşdırırıq. Nəticələr əldə olunduqdan sonra məktəblərə veriləcək kompyuterlərin sayı, eləcə də bu il məktəblərin texniki təchizatı xərcləri müəyyən olunacaq. Əldə olunan nəticələr bizə kompyuterlərin kəskin çatışmazlığının hiss olunduğu müəssisələrə tədarük prosesini sistemləşdirməyə imkan verəcək", - Sadıqov bildirib.
Təhsil Nazirliyinin statistikasına görə, bu gün Azərbaycanda ibtidai məktəb şagirdləri istisna olmaqla, hər 20 şagirdə bir kompyuter düşür. Bu göstərici kompyuterlərin orta təhsil müəssisələrinə beş il əvvəlki nüfuzetmə səviyyəsini 60 dəfə üstələyir. O zaman hər 1036 şagirddən birinə cəmi bir kompyuter düşürdü.
Orta təhsil müəssisələrinin kompyuterləşdirilməsi üzrə işlər 2008-2012-ci illərdə Azərbaycanda TİMS Dövlət Proqramı çərçivəsində aparılır.
Layihənin əsas məqsədi İT-dən istifadə olunmaqla və ölkənin dünya təhsil sisteminə inteqrasiyası yolu ilə təhsilin keyfiyyətinin yüksəldilməsi üçün vahid təhsil informasiya mühitinin yaradılmasıdır. Bu, ilk növbədə ölkədəki təhsil sistemini effektiv idarə etməyə, eləcə də İnternet şəbəkəsi vasitəsilə xarici ölkələrin təhsil müəssisələrilə əlaqə saxlamağa imkan verəcək.