İlin sonunadək "Azərpoçt"un filiallarının əksəriyyətində "Western Union" pul köçürmələri sistemindən istifadə mümkün olacaq

Azərbaycan, Bakı, 16 fevral /Trend, müxbir H.Vəliyev/

"Western Union" sistemi ilə pul köçürmələri xidmətləri ilin sonunadək Azərbaycan dövlət poçt rabitəsi operatoru "Azərpoçt" MMC-nin şöbələrinin əksəriyyətində mümkün olacaq. Trend-in məlumatına görə, bu barədə çərşənbə günü Rabitə və İnformasiya Texnologiyaları Nazirliyinin Poçt rabitəsi şöbəsinin müdiri, Regional Poçt Rabitəsi təşkilatında Poçt rabitəsi üzrə komissiyanın sədri Novruz Məmmədov bildirib.

Bu gün Bakıda "Azərpoçt" MMC və "Western Union" şirkətinin nümayəndələri arasında operatorun filial şəbəkəsində bu sistem üzrə pul köçürmələri xidmətlərinin göstərilməsi ilə bağlı görüş keçirilib.

Pul köçürmələrinin həyata keçirilməsi üzrə tərəfdaşlıq sazişi ötən ilin noyabrında imzalanıb.

"Western Union" şirkətinin Şərqi Avropa və MDB üzrə regional vitse-prezidenti Conatan Klausun sözlərinə görə, "Western Union"un "Azərpoçt"la sazişi respublikanın demək olar, hər bir yaşayış məntəqəsində pul köçürmələrinin yola salınması və alınması üçün şərait yaradır.

O, bildirib ki, "Western Union" şirkətinin Azərbaycanın poçt operatoru ilə əməkdaşlığı şirkətin müştərilərinə sayılı dəqiqələrdə Azərbaycanın həm şəhər, həm də kənd şöbələrindən dünyanın istənilən nöqtəsinə və nöqtəsindən pul köçürmələrinin yola salınması və alınması imkanının verir.

Öz növbəsində, Məmmədov Dünya Bankının dəstəyi ilə redallaşdırılan maliyyə xidmətlərinin inkişafı layihəsi haqqında danışaraq "Western Union" şirkəti ilə əməkdaşlığın uzun və məhsuldar olacağına əminliyini ifadə edib.

Respublikanın poçt şöbələrində maliyyə xidmətlərinin göstərilməsi maliyyə xidmətlərinin inkişafı layihəsi çərçivəsində həyata keçirilir. Proqrama görə, "Azərpoçt"un 1600 poçt şöbəsindən 1200-ü maliyyə və bank xidmətləri göstərəcək. Həmin xidmətlər arasında müxtəlif ödənişlər, hesabların açılması, eləcə də pul köçürmələrinin göndərilməsi və alınması da var.