Azərbaycan, Bakı, 9 mart /Trend, müxbir H.Vəliyev/
Simsiz internet-texnologiyalar və rabitənin tətbiqi məsələləri oktyabrın 12-14-də Bakıda keçiriləcək AICT-2011 V Beynəlxalq konfransda müzakirə ediləcək. Bu barədə Azərbaycan Milli Elmlər Akademiyasının İnformasiya Texnologiyaları İnstitutunun çərşənbə günü yaydığı məlumatda deyilir.
Konfransın mövzusu geniş diapazonda texniki problemlər, əsasən də böyük maraq kəsb edən simsiz internet, üçüncü və dördüncü nəsil (3G və 4G) mobil texnologiyaları əhatə edəcək.
AICT-2011 konfransının təşkilatçısı Rabitə və İnformasiya Texnologiyaları Nazirliyi, Təhsil Nazirliyi və Qafqaz Universitetidir.
Konfransın keçirilməsində məqsəd İKT sahəsində və internet sənayesində dövrün tələbinə uyğun yüksəksəviyyəli innovativ tədqiqatları və işləri üzə çıxarmaqdır.
Dünyanın müxtəlif ölkələrindən olan alim və mütəxəssislərin iştirakı ilə keçiriləcək tədbirdə İKT-nin təhsil, elm, iqtisadiyyat, biznes və idarəetmə, təhlükəsizlik və səhiyyə sistemində tətbiqi ilə bağlı məruzələr dinləniləcək.
