Аzərbaycan, Bakı, 16 mart /Trend, müxbir H.Vəliyev/
Azərbaycanın mobil rabitə operatoru "Azerfon" MMC ilin sonunadək şəbəkənin genişləndirilməsinə 50 milyon manat həcmində sərmayə yatıracaq. Bu barədə çərşənbə günü Trend-ə şirkətin korporativ əlaqələr üzrə meneceri Elşad Fərzəliyev bildirib.
Fərzəliyevin sözlərinə görə, bu yalnız investisiyaların ilkin məbləğidir. Bu vəsaitin hesabına regional səviyyədə ikinci nəsil şəbəkəsi kimi, 3G üçüncü nəsil şəbəkəsinin də genişləndirilməsi planlaşdırılır.
Bu gün "Azerfon" mobil operatorunun 3G şəbəkəsi Bakı, Abşeron yarımadası və Sumqayıtla yanaşı, Gəncə, Şirvan, Naxçıvan, Mingəçevir, Şəki, Tovuz, Şəmkir, Quba, Xaçmaz və Lənkəranda yayılıb.
Bu regionların əhalisi ənənəvi səs xidmətləri ilə yanaşı, məlumatların yüksək sürətlə ötürülməsi, mobil televiziya, videozənglər və digər xidmətlərdən istifadə edə biləcək.
"Azerfon" şirkətinin məlumatlarının ötürülməsi sürəti 7,2 Мbit/s-yə çatır ki, bu da çoxmedialı kontentin operativ yüklənməsini, yüksəksürətli internet şəbəkəsinə çıxışı, elektron poçt və fayl əlavələrini mübadilə etməyə imkan verir. 3G şəbəkəsinin istifadəçiləri bu standartı dəstəkləyən mobil telefonların köməyi ilə böyük həcmdə məlumat və videotəsvirləri qəbul edə və ötürə bilərlər.
Şirkətin gələcək planlarında bütün respublika üzrə 3G-nin genişlənməsi nəzərdə tutulur.
