Azərbaycan, Bakı, 6 iyun /Trend, müxbir H.Vəliyev/
Rabitə və İnformasiya Texnologiyaları Nazirliyi Azərbaycanın informasiya-kommunikasiya sektorunda Avstriya sərmayələrinin artmasına kömək edəcək. Bu barədə Trend-ə bazar ertəsi nazirlikdən məlumat verilib.
Məlumata görə, bu məqsədlə nazirliyin nümayəndə heyəti iyunun 8-9-da Vyanada keçiriləcək Avropa və Mərkəzi Asiya üzrə Ümumdünya İqtisadi Forumunun regional sammitinin işində iştirak edəcək.
Nümayəndə heyətinə rabitə və informasiya texnologiyaları naziri, Azərbaycan-Avstriya hökumətlərarası komissiyasının həmsədri Əli Abbasov başçılıq edəcək.
Abbasov hökumətlərarası komissiyanın həmsədri, Avstriyanın iqtisadiyyat, ailə və gənclər nazirinin müavini Bernadett Gerlinger, nəqliyyat, innovasiya və texnologiyalar nazirinin İKT sahəsi üzrə məsul nümayəndəsi Andreas Rayhardla görüşəcək.
Sammit çərçivəsində nazir Abbasov Azərbaycanda İKT sektorunun inkişaf tendensiyaları, bu sahədə həyata keçirilən layihələr, eləcə də "Şərq-Qərb" informasiya supermagistralının tikintisi layihəsi haqqında məlumat verəcək.
Sammitin gedişində Azərbaycan-Avstriya Ticarət Palatasının üzvü olan bu ölkənin İT şirkətlərinin nümayəndələri ilə görüş keçiriləcək. Görüşdə əsas məqsəd onların Azərbaycanın İKT sektoruna cəlb edilməsidir.