Azərbaycan, Bakı, 9 iyun /Trend, müxbir H.Vəliyev/
Azərbaycan əqli mülkiyyətin müdafiəsi məsələlərinə böyük diqqət ayırır. Trend-in məlumatına görə, bu barədə cümə axşamı Ümumdünya Əqli Mülkiyyət Təşkilatının (ÜƏMT) nümayəndə heyətinin rəhbəri, təşkilatın Avropa və Asiya ölkələri şöbəsinin direktoru Mixail Svantner Bakıda "Texnologiyaların transferi" mövzusu üzrə ikigünlük seminarda bildiirb.
Onun sözlərinə görə, ölkə bu sahədə Standartlaşdırma, Metrologiya və Patent üzrə Dövlət Komitəsinin düşünülmüş fəaliyyət strategiyası sayəsində müəyyən uğurlara nail olub.
"Bu yaxınlaradək biz adətən yüksək inkişaf etmiş və inkişaf etməkdə olan ölkələrdən danışırdıq, bu zaman keçid iqtisadiyyatına malik, özəl biznesin inkişaf etdiyi ölkələrdə əqli mülkiyyət sahəsində potensilaın yetişməsi planında doğru yolun seçimi ilə bağlı vəzifələrimizi diqqətə almırdıq. Biz bu ölkələrdəki əqli mülkiyyətin müdafiəsinə kömək etməyə cəhd edirik. Bu kontekstdə biz keçid iqtisadiyyatına malik ölkələrin tələbatını nəzərə alaraq, ciddi mexanizmləri inkişaf etdirməyə başlamışıq", -Svantner deyib.
Onun sözlərinə görə, Ümumdünya Əqli Mülkiyyət Təşkilatı bu gün ictimaiyyət üçün əlçatan olan lazımi mexanizm və alətləri inkişaf etdirməyə nail ola bilib və bu sahədə uğur əldə etmiş ölkələrin təcrübəsi keçid iqtisadiyyatına malik ölkə kimi Azərbaycana faydalı ola bilər.
Hazırda Azərbaycanda 2011-2014-cü illər üçün əqli mülkiyyət sahəsində milli strategiyanın qəbul ediləcəyi gözlənilir. Sənəd baxılmaq üçün Nazirlər Kabinetinə təqdim edilib. Hazırda texniki aspektlərin müzakirəsi aparılır və sənəd əlavə və dəyişikliklərdən sonra yaxın vaxtlarda qəbul ediləcək.
Strategiyada əqli mülkiyyət sahələrinin problemləri öz əksini tapıb, saxta məhsulların istehsalı və satışı ilə mübarizə metodları və s. ora daxil edilib. Ümumilikdə strategiya 30 məqsədli istiqaməti nəzərdə tutur ki, burada təxminən 90 konkret tədbir birləşdirilib.
Azərbaycan dünyada əqli mülkiyyət sahəsində uzunmüddətli milli strategiyanın qəbul ediləcəyi ilk ölkələrdən biri ola bilər. Bu istiqamətdə işlərin əlaqələndirilməsi məqsədilə artıq birgə komissiya yaradılıb və onun tərkibinə Azərbaycanın Müəllif Hüquqları Agentliyi və Standartlaşdırma, Metrologiya və Patent üzrə Dövlət Komitəsinin mütəxəssisləri daxil edilib.
