Azərbaycan, Bakı, 19 avqust /Trend, müxbir H.Vəliyev/
Azərbaycanın 5 dövlət müəssisəsi "Elektron hökumət" portalına qoşulub. Bu barədə Trend-ə cümə günü SayberNet şirkətinin baş direktoru İlham Namazov deyib.
Namazovun sözlərinə görə, portala Rabitə və İnformasiya Texnologiyaları, Vergilər nazirlikləri, Dövlət Gömrük Komitəsi, Dövlət Sosial Müdafiə Fondu və Əmək və Əhalinin sosial Müdafiəsi Nazirliyi qoşulub.
Azərbaycanın sistem inteqratoru funksiyasını yerinə yetirən "SayberNet" şirkəti sistemin texniki qurulması üzrə işləri görəcək struktur kimi seçilib.
"Gözlənildiyinə görə, artıq sentyabrda portalda təmsil olunan dövlət qurumlarının sayı artacaq, onların seçim kriteriyası isə İT infrastrukturunun hazırlığından asılı olacaq", - Namazov qeyd edib.
"Elektron hökumət" portalının təqdimatı bu gün Rabitə və İnformasiya Texnologiyaları Nazirliyinin keçirilən kollegiya iclasında olub.
İşə salınması yaxın vaxtlarda gözlənilən "Elektron hökumət" portalı vətəndaşlarla və dövlət və özəl sektorun müəssisələri ilə işi əlaqələndirən əsas alət olacaq.
"Elektron hökumət" portalının yaradılmasında mövcud informasiya bazalarını və müxtəlif platformalarda yaradılan sistemləri birləşdirəcək X-Road sisteminin prinsipindən istifadə olunacaq. X-Road sistemi müxtəlif dövlət təşkilatlarının məlumat bazalarını birləşdirməyə, əhaliyə kompozit xidmətlər göstərməyə, eləcə də "dövlət-vətəndaş" dialoqunun aparılması imkanı ilə interaktiv servisləri təqdim etməyə imkan verəcək.
İdarə və nazirliklərin bir-biri ilə sıx əlaqəsi üçün elektron-rəqəmsal imzanın olması lazımdır. Azərbaycan Rabitə Nazirliyi elektron imzanın verilməsi mərkəzinin yaradılması üzrə işləri artıq başa açtdırıb. Mərkəz yaxın vaxtlarda təcrübi istismara hazır olacaq.
