Azərbaycan, Bakı, 6 sentyabr /Trend, müxbir H.Vəliyev/
Rabitə və İnformasiya Texnologiyaları Nazirliyinin "Bakı Telefon Rabitəsi" İstehsalat Birliyi CDMA standartlı simsiz rabitə şəbəkəsinin genişləndirilməsinə başlayıb. Bu barədə Trend-ə çərşənbə axşamı İB-nin CDMA xidmətləri şöbəsinin rəhbəri Murad Cəbrayılov deyib.
O bildirib ki, hazırda operator CDMA baza stansiyasını Mərdəkan qəsəbəsində quraşdırmaqla məşğuldur. Ümumilikdə isə ilin sonunadək operator əlavə üç baza stansiyası quraşdıracaq.
Cəbrayılov deyib ki, yeni stansiyalar Bakıda və paytaxt ətrafında siqnal qəbuletmə səviyyəsi aşağı olan yerlərdə işə salınacaq və bu yerlər monitorinq aparılaraq təyin ediləcək.
Cihazları Çin şirkəti "Huawei Technologies" təqdim edir.
Onun sözlərinə görə, hazırda operatorun CDMA üzrə nömrə tutumu 20 minədək artırılıb, onların səkkiz min yarımı artıq istifadədədir.
DSL genişzolaqlı internet şəbəkəsinə alternativ olan CDMA internetə girişi xüsusilə ucqar rayon və məntəqələrdə asanlaşdırır, çünki həmin yerlərə kabel çəkməyin qiyməti həddindən artıq baha başa gəlir.
