Azərbaycan, Bakı, 12 sentyabr /Trend, müxbir H.Vəliyev/
Noyabrın üçüncü ongünlüyünün əvvəlində Rabitə və İnformasiya Texnologiyaları Nazirliyinin "Teleradio" İstehsalat Birliyi Qubada rəqəmli televiziyanı işə salmağı planlaşdırır. Bu barədə Trend-ə bazar ertəsi İB-nin baş direktoru Əflatun Şərifov deyib.
"Hazırda televiziya qülləsinin tikintisi başa çatıb və gözlənildiyi kimi, rəqəmli ötürücünün işə salınması noyabrın 20-nə planlaşdırılır", - o deyib.
Şərifovun sözlərinə görə, nazirliyin tapşırığına əsasən, həmin tarixə qədər, işğal olunmuş ərazilər istisna olmaqla, ölkənin 85% ərazisinin rəqəmli siqnalla əhatə olunması planlaşdırılır. Hazırda əhatə dairəsində Bakı, Gəncə, Şirvan, Lerik, Lənkəran və yaxın ərazilər var.
Naizrliyin iş planına əsasən, rəqəmli televiziyaya tam keçid 2013-cü ildə gözlənilir.
Rəqəmli kontentin yayımı MPEG-4 standartı ilə həyata keçirilir. Bunun üçün istifadəçilər dekoder əldə etməlidirlər.
