Azərbaycan, Bakı, 19 sentyabr /Trend, müxbir H.Vəliyev/
Avstriya informasiya-kommunikasiya texnologiyaları (İKT) sahəsində Azərbaycanda həyata keçirilən layihələrdə iştirak etməkdə maraqlıdır. Trend-in məlumatına görə, bunu bazar ertəsi jurnalistlərə nazirliyin beynəlxalq əlaqələr və qeyri-hökumət qurumları ilə iş şöbəsinin müdiri Ayaz Bayramov deyib.
Onun sözlərinə görə, əməkdaşlıq məsələlərinin sabah nazirlikdə keçiriləcək "Elektron hökumət" mövzusunda xüsusi diskussiya panelində müzakirə edilməsi planlaşdırılır.
"Avstriya tərəfi Azərbaycanda regional innovasiya zonasının (RİZ) təşkili, "Şərq-Qərb" informasiya supermagistralının tikintisi və ölkədə İKT sahəsində həyata keçirilən digər layihələrdə, o cümlədən Avstriyanın hazır həllərlə çıxış etdiyi "Elektron hökumət" qurulması layihəsində iştirak etməkdə maraqlıdır", - Bayramov deyib.
Avstriya şirkətlərinin RİZ layihəsində iştirakına gəlincə, Bayramovun sözlərinə görə, bu, iştirak şərtlərinin Avstriya tərəfinə nə qədər sərf edəcəyindən asılıdır.
Bundan əvvəl bildirilib ki, Azərbaycanda RİZ-in (texnoloji park) tikintisi layihəsində onun həyata keçirilməsində mühüm rol oynayacaq beş əsas istiqamət nəzərdə tutulub.
Əsas istiqamətlər siyahısına DATA-mərkəzin təşkili, insan resurslarının inkişafı, kiçik və orta sahibkarlığın inkişafı, investisiyanın cəlb olunması və ölkənin ixrac potensialının inkişafı daxildir.
Bu gün texnoloji parkın funksiyası üçün dövlət proqramı hazırlanıb, qanunvericilik bazası işlənib, qaydalar və normativ sənədlər müəyyən olunub.
Hazırda nazirliyin texnoloji parkın təşkili üzrə təklifini hökumət nəzərdən keçirir.
RİZ-in təşkili layihəsi innovativ sahibkarlığın inkişafı, proqram təminatının istehsalı və ixracı üzrə regional baza üçün texnoloji parkların təşkili, habelə ölkənin effektiv tranzit informasiya mərkəzinə çevrilməsini nəzərdə tutur.
Bu məsələlərin müsbət həlli məhsulların Azərbaycana idxalı üçün əlverişli şəraitə təkan verəcək, həmçinin ölkə ərazisində xarici investorların sonrakı mərhələdə məhsullarının regional bazarlara ixracı üçün istehsal xəttinin təşkilinə yardım edəcək.