Azərbaycan, Bakı, 29 sentyabr /Trend, müxbir H.Vəliyev/
Azərbaycan və Qazaxıstan müştərək telekommunikasiya layihələrinin həyata keçirilməsində əməkdaşlıq edəcək. Trend-in məlumatına görə, bu barədə iqtisadi əməkdaşlıq üzrə Azərbaycan-Qazaxıstan hökumətlərarası komissiyanın cümə axşamı keçirilən VIII iclasının yekunlarına dair imzalanmış protokolda qeyd edilir.
Protokolda Azərbaycan Rabitə və İnformasiya Texnologiyaları Nazirliyi ilə Qazaxıstan İnformasiyalaşdırma və Rabitə Agentliyi arasında bundan əvvəl imzalanmış niyyət protokoluna uyğun olaraq, Siyəzən (Azərbaycan) - Kindərli (Qazaxıstan) sualtı optik-lif kabel magistralının çəkilməsi işlərinin tezləşdirilməsinin vacibliyi qeyd olunur.
Komissiya iki ölkənin rabitə idarələrinə Azərbaycan və Qazaxıstanın beynəlxalq rabitə operatorlarının iştirakı ilə Xəzər dənizinin dibi ilə optik-lif kabel magistralının tikintisi üzrə tədbirlərin həyata keçirilməsi işlərinin davam etdirilməsi və komissiyanın növbəti iclasında hər iki ölkənin rabitə operatorlarının Trans-Avrasiya superinformasiya magistralının (TASAM) tikinti layihəsinin reallaşdırılmasında iştirakı məsələsini müzakirə etməyi tapşırıb.
Azərbaycan və Qazaxıstan arasında həmçinin Azərbaycanın Rabitə və İnformasiya Texnologiyaları Nazirliyinin Beynəlxalq Əlaqələr və Hesablaşma Mərkəzi və KazTransCom arasında bağlanmış protokol da var ki, bu sənədə əsasən, kabel magistralının çəkilmə üzrə xərclərin 50 faizi Azərbaycan, 50 faizi isə Qazaxıstan tərəfindən ödəniləcək.
İki ölkə arasındakı marşrutun uzunluğu təxminən 380 kilometr olacaq. Hazırda mövcud marşrut Türkmənistan və İrandan keçib Azərbaycandan yan keçir.
Kabelin Azərbaycandan çəkilməsi marşrutu təxminən 2 min kilometr azaldacaq ki, bu da öz növbəsində, informasiyanın göndərilmə trafikini tezləşdirəcək.