Azərbaycan, Bakı, 1 fevral /Trend, müxbir H.Vəliyev/
"Softprom" şirkətinin Azərbaycandakı nümayəndəliyi respublika ərazisində "VeriSign" məhsullarının irəliləyişi ilə məşğul olacaq. Bu barədə çərşənbə günü Trend-ə "Softprom Azerbaijan" şirkətinin baş direktoru Oleq Çeçnyov məlumat verib.
Onun sözlərinə görə, bu istehsalçının həllərinin irəliləyişi yanvarın sonlarında "Softprom" (MDB ölkələrində lisenziyalı proqram təminatının distribüteri) və "Symantec" şirkətləri arasında imzalanmış müqaviləyə əsasən həyata keçiriləcək.
"Əldə olunmuş razılaşma çərçivəsində ilkin tədarüklər artıq Gürcüstanda həyata keçirilib. Azərbaycan bazarına gəlincə, burada şübhəsiz ki, bu istehsalçının məhsullarının irəliləyişi gözlənilir. Hazırda biz bunun necə həyata keçiriləcəyi ilə bağlı planlar hazırlayırıq, çünki biz həm də distribüter kimi çalışırıq və bizim öz yanaşmamız var. Tərəfdaşlarımız artıq bu barədə məlumatlandırılıblar", - Çeçnyov bildirib.
"Softprom" şirkəti "VeriSign" həllərinin üç əsas kateqoriyasının irəliləməsinə maksimum diqqət ayıracaq. Onların arasında Secure Sockets Layer (SSL), VeriSign Trust Seal sertifikatları və Code Signing Certificate Services (CSCS) servisi var.
SSL sertifikatları istifadəçilərin etimad səviyyəsinin artırılmasına imkan verir, çünki saytdakı zərərli kodun olmamasına zəmanət verir. Saytda şübhəli kodun meydana çıxdığı halda, Trust Seal SSL sertifikatları sahiblərini məlumatlandırmaq, CSCS servisləri isə qlobal şəbəkədə yayılan proqram kodunun müdafiəsi üçün nəzərdə tutulub.
